Rusiyeli adliyeci Mark Feygin qayd ete ki, Qırımda «separatizm» içün mahküm etilgen ve mecburen ekspertiza içün psihiatrik hastahanege keçirilgen Qırımtatar Milliy Meclisi reisiniñ muavini İlmi Umerovnıñ hastalıqları, oña kerçek ceza müddeti berilmesini imkânsız yapa.
Bu aqta o Qırım.Aqiqatqa bergen izaatında bildirdi.
«Eger siz, taqiqat olaraq, añlağan olsañız ki, bu insannı apiske qapatmaq mümkün degil, çünki o anda ölecek, demek ki, özüñizge esabat bermelisiñiz, eger onı böyle psihiatrik ekspertizağa yollağan olsañız, o hastahanede öle bile. Eger o ölse, kim mesüliyetli olacaq? Biz adiy bir sual beremiz», – dedi Feygin.
Onıñ sözlerine köre, şimdiki vaqıtta Umerov bulunğan Aqmescit hastahanesi «deşetlidir».
«O yerdeki şarait deşetlidir! Anda ayaqyol azbarda, tabanda üç teşik. O yerde unitaz yoq, añlaysıñız», – dep çorlana Feygin.
Rusiyeli FSB bu sene mayıs ayında İlmi Umerovğa qarşı «separatizm» maddesi boyunca cinaiy iş açtı.
Sağlıq alına baqmadan, Rusiyege boysunğan Aqmescitteki Kiyev rayon mahkemesi Umerovnıñ statsionar mahkeme-psihiatrik ekspertizadan keçmesi kerek olğanı aqqında qarar aldı. Psihiatrik hastahanede İlmi Umerovnıñ sağlıq alı yaramaylaştı.
Human Rights Watch Halqara uquq qoruyıcı teşkilâtı rusiyeli ükümetten Qırımtatar Milliy Meclisi reisiniñ muavini İlmi Umerovnıñ, onıñ sağlıq alı munasebetinen kerekli tedaviylenüvden keçmesi kerek olğanı içün, Aqmescit psihiatrik hastahanesinden deral azat etilmesini talap etti.
İlmi Umerovğa destek aktsiyaları Ukrainada ve bir sıra avropalı devlette keçirile.
