Koktebel Jazz Fest ukrain festivali avgust 25-te, cumaaqşamı künü açıldı, bu sene merasim Odessa vilâyetindeki Çernomorskta keçirile.
«Kerçekten de, yañı meydançıq, pek güzel, mence, Odessa vilâyetinde eñ mavı deñiz», – dep qayd etti festival prezidenti Liliya Mlinariç.
Mlinariç merasim teşkil etilmesinde yardım köstergeni içün Aqmeçit şeer şurasınıñ medeniyet bölügi yolbaşçısı Yuliya Kristanovağa teşekkür bildirdi, o ise festivalniñ ukrain qalğanınıñ müimligini qayd etti.
«Bu festivalniñ bütün teşkilâtçılarına o ukrain brendi qalğanı içün teşekkür bildirmege isteyim. Bizim içün qabul etken taraf olmaq, şeerimizniñ vaqialı turizmde yañı saifeni açmaq şereftir. Bu leyha İlyiçevsk gemi tamiri işhane ve şeer akimiyeti, medeniyet bölügi müessiseleriniñ destegi neticesinde mümkün oldı», – dep ayttı Kristanova.
Qırım Rusiye tarafından işğal etilgen soñ Koktebel Jazz Festivali mecburen Ukrainanıñ qıtaiy qısmında, evel merasim keçirilgen Köktebel köyünden uzaqta, keçirile. Teşkilâtçılarnıñ aytqanına köre, endi bu yerge belli ecnebiy artistlerni ketirip olamaylar.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
