Link açıqlığı

İşğal etilgen Aqmeçit rayonında Tarhan Qut burnunda avtomobil yardan tüşti ve qayada asılıp qaldı. Bu aqta Qırım qaza-qurtarıcı hızmetinde bildireler.

«Aydavcı, ZAZ DEO avtomobilinde burulıp, maşnanı idare etip olamadı, neticede maşna Tarhan Qut burnunıñ terenligi 20 metr olğan yarından tüşti. Maşna 10 metr terenliginde asılıp qaldı. Avdavcınıñ özü, ögdeki pencereden deñizge tüşti, ve zararlanmadı. Diger zararlanğanlar yoq», – dep añlattılar müessisede.

Vaqia avgust 24-te gece yüz berdi, bunıñ içün qurtarıcı ameliyat avgust 25-te kündüz yapılacaq, dep qayd etile beyanatta.

Avgust 11-de Sudaq civarında yolcu avtobusı yardan tüşti, yedi kişi elâk oldı, 13 adam zararlandı.

Qırım işğal etilgen soñ yarımadada yol qazalarınıñ sayısı arttı. Qırım sakinleri yollarda maşnalarnıñ sayısı da artqanını, bunen beraber, meskün yerlerde ve şeerlerara yollarda yol areketi qaideleri bozuvlarını qayd ete.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG