Avgust 25-te saba italiyalı qurtarıcılar bildirdi ki, avgust 24-te devletniñ merkeziy qısmında yüz bergen zelzele qurbanlarınıñ sayısı 257-ge yetti.
İtaliya baş naziri Matteo Rentsi avgust 24-te aqşam milletke televizion muracaatında iç bir qoranta, iç bir şeer ve iç bir köy diqqatsız qalmaycağını vade etti.
Ukraina Tışqı işler nazirliginiñ Radio Svobodağa bildirgenine köre, şimdiki vaqıtta elâk olğanlar ve zararlanğanlar arasında Ukraina vatandaşları yoq.
6,2 magnitudalı zelzele paytaht Romanıñ şimaliy-şarq tarafınadaki yerde gece yüz berdi. Eñ çoq viraneler Akkumoli, Amatriçe ve Arkuata-del-Tronto şeerlerinde oldı.
Zelzele yüz bergen yer italiyalı Latsio, Abrutstso, Marke ve Umbriya regionları birleşken yerdir. Bu, yedi yıl evel şiddetli zelzele neticesinde eñ çoq zararlanğan Akvila şeerinden tahminen 40 kilometr uzaqlığındadır. O vaqıt, 2009 senesi, 5,9 magnitudalı zelzele neticesinde 309 adam elâk oldı. Şimdiki vaqıtta yüz bergen zelzele daa küçlü, amma vaqia olğan yerniñ eali daa azdır, bunıñ içün qurbanlarnıñ sayısı azca olacağına ümüt beslenile edi.
