Terroristik faaliyet yapqanında qabaatlanıp, FSB tarafından yaqalanğan Vadim Siruknıñ qorantasında bala doğdı. Mühbir ve şaire Lilâ Bucurovanıñ Facebook saifesinde bildirgenine köre, yaqalanğannıñ apayı Anna Bogaçeva ekinci qıznı doğurdı. Qıznıñ adı daa bildirilmey.
«Yazıq ki, bu yañı qızçıqnıñ ilk nefesi, onıñ babası azatlıq nefesini alıp olamağan anda alındı. Amma o apisten çıqqan soñ (bu ise, İnşallah, mıtlaqa olacaq), evde, apayı ve büyük qızı Amiradan (bügün o 2,5 yaşında) ğayrı, onı daa bir güzel qarşılaycaq», – dep yazdı Bucurova.
Yalta sakini Vadim Siruk bu sene fevral ayında Yaltada rusiyeli mahsus hızmetler tarafından yaqalandı. O, Rusiyede terroristik sayılğan «Hizb ut-Tahrir» teşkilâtında iştirak etkeninde qabaatlana.
Ondan ğayrı, aynı vaqıtta uquq qoruyıcı Emir-Usein Kuku, Aluşta sakini Muslim Aliyev ve Yalta rayonı sakini Enver Bekirov yaqalandı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
