Soñki malümatlarğa binaen, İtaliyada yüz bergen zelzele neticesinde 73 kişi elâk oldı, dep bildire çarşenbe künü yerli televizion, vatandaşlar mudafaası hızmetiniñ malümatına esaslanıp.
Rusiyeli «İnterfax» yazğanına köre, ükümet tarafından alınğan malümatqa binaen, 53 adam Latsio vilâyetinde, daa 20 kişi Marke vilâyetinde elâk oldı.
Vatandaşlar mudafaası hızmetinde qayd etkenlerine köre, bu kesen malümat degildir. Bundan da ğayrı, tahminen 100 adam yaralandı ve şimdiki vaqıtta tıbbiy yardım ala.
Bundan evel 63 kişi elâk olğanı aqqında bildirilgen edi.
Zelzele neticesinde eñ çoq Akkumoli, Amatriçe, Posta ve Arkuata-del-Tronto meskün yerleri zararlandı. Vaqia yüz bergen yerde askerler, politsiya hadimleri ve «Qırmızı Haç» regional bölüginiñ göñüllilernen beraber qurtarıcılar taqımları çalışa.
6,2 magnitudalı zelzele merkeziy İtaliyada çarşenbe kününe keçer gecesi yüz berdi.
