Şimdiki vaqıtta Aqmescit apishanesinde bulunğan Qırım siyasiy mabusı, Qırımtatar Milliy Meclisi reisiniñ muavini Ahtem Çiygoz Ukraina Mustaqillik künü ile hayırlay ve ukrainlerni öz devletiniñ mustaqilligini qorçalamağa ve onı coymamağa çağıra, prezident Petro Poroşenkoğa ise, bunıñ kefili olmağa rica ete.
Ahtem Çiygoznıñ muracaatı nushasını içtimaiy ağlarda Qırımtatar Milliy Meclisi reisi Refat Çubarov ve Ukraina prezidentiniñ qırımtatar halqı meseleleri boyunca vekâletlisi Mustafa Cemilev paylaştı.
«Endi üç yıl devamında Ukraina Mustaqillik kününi Qırım işğali şaraitinde qayd etmek mecburmız. Bizden bazıları ar-namusını, tuvğan topraqqa sevgisini, öz halqına, Ukrainağa sadıqlığı saqlağanı ve Qırımnı rusiyeli olğanını tanımağanı içün apishanelerge qapatıldı», – dep aytıla beyanatta.
Onıñ fikrince, Ukraina halqınıñ mustaqilligi coyması telükesi olsa, er bir kişi «öz vazifesini yapmaq ve öz kelecegini ve kelecek nesillerniñ kelecegini qorçalamaq mecbur». Çiygoznıñ qayd etkenine köre, qırımtatarlar muvafaqiyetli, demokratik, avropalı Ukraina içün küreşmege devam ete.
«Ürmetli Ukraina prezidenti! Devletniñ bir qaç ükümet dalı bar, amma hususan prezident Esas qanun kefili ola ve öz halqı ve devletiniñ bugünki alı ve kelecegi içün mesüliyetlidir», – dep Çiygoz ukrain prezidentine ayrı muracaat etti.
Avgust 24-te, çarşenbe künü Ukrainada Mustaqillik künü qayd etile. 25-ci doğğan kününde bütün devlet boyunca tantanalı merasimler keçirilecek. Prezident Petro Poroşenko, arbiy parad merasiminde sözde bulunıp, Ukrainada işğal etilge Qırım ve Donbass sakinleri aqqında hatırlağanlarını qayd etti.
Ahtem Çiygoz Qırımda «fevral 26 işi» boyunca mahküm etile, onı yarımadada Rusiye tarafından işğalden soñ açtılar. Bu iş boyunca Ali Asanov ve Mustafa Degermenci de apiste buluna.
Qırımtatarlarnı, Qırımnıñ şimdiki yolbaşçısı Sergey Aksönov yolbaşçılığında «Rus birligi» firqasınıñ faallerine qarşı çıqqan Ukraina topraq bütünligi tarafdarlarınıñ mitinginde iştirak etüv içün mahküm eteler.
