Link açıqlığı

İtaliyada zelzeleden olğan omravlar tübünde 38 elâk olğan kişi tapıldı (video)


Eñ azdan 38 kişi merkeziy İtaliyada yüz bergen zelzele neticesinde elâk oldı. Saat 3:36-da zelzele ortası paytaht Latsio regionında yerleşken Akkumoli ve Amatriçe şeerlerinde olğan, tahminen 6 magnitudalı şiddetli türtme yüz berdi.

İtaliya Vatandaşlarnı qorçalama agentligi bildire ki, şimdilik çoq adam ğayıp olğan. Qurtarıcılar adamlarnı omravlar tübünde qıdırmağa devam ete.

Radio Svoboda mühbiriniñ bildirgenine köre, eñ çoq viranlar tahminen biñ adam yaşağan Akkumoli meskün yeri ve eali 2,5 biñden ziyade olğan Amatriçede oldı. Yerli akimiyet haber ete ki, elâk olğanlarnıñ sayısı ziyade ola bile, omravlar tübünden zararlanğan kişilerniñ sesleri eşitile, olarnıñ arasında balalar bar.

Vaqia yüz bergen yerge qurtarıcı hızmetler ve zararlanğanlar içün kerekli yardım kelmege devam ete. Vatandaşlarnı qorçalama hızmetiniñ bildirgenine köre, viran etilgen rayonlarğa yollarnı ev omravlarınen blok etilgen tar soqaqlar ağırlaştıra. Amatriçe şeeriniñ hastahanesinden adamlar tahliye etildi. Ekimler yaralanğanlar içün qan cıyması aqqında ilân etti.

Şimdilik zararlanğan ukrainler aqqında malümat yoq, dep bildirdiler Radio Svobodağa Romada Ukraina Elçiligi konsul bölüginde.

Yerastı türtmeler Marke, Umbrii, Toskane ve Abrutstso vilâyetlerinde de duyuldı. Romada 20 saniye devam etken eki türtme oldı. Adamlar soqaqlarğa çapıp, ev tışında tañğa qadar oturdı.

Umumen olaraq keçken gece seysmologlar merkeziy İtaliyada çeşit quvetli 18 yerastı türtmeni qayd etti. İşbu dağlı Apennin yeriniñ seysmik seviyesi yüksektir. İtaliyada soñki şiddetli zelzele 2009 senesi L’Akvila şeerinde yüz berdi, o vaqıt 300-den ziyade kişi elâk oldı.

XS
SM
MD
LG