Ayşe Umerova – Qırım psihiatrik hastahanesinde mecburen tutulğan Qırımtatar Milliy Meclisi reisiniñ muavini İlmi Umerovnıñ qızı babasınıñ tıbbiy köstergiçleri yaramaylaşqanı, bunen beraber, oña aş berilmesi sıñırlanğanı aqqında bildire.
Onıñ sözlerine köre, psihiatrik hastahanede 6 kün devamında bulunğan soñ, bundan evel İlmi Umerovdan alınğan talil neticeleri bildirildi.
«Bütün köstergiçler qarardan ziyade: şeker, holesterin, bilirubin. Onıñ alı eyileşmey – er kün qan basımı köterile, şeker deñişe, o özüni zayıf duya. Onı ziyaret etkenimiz vaqıt da biznen çoq qonuşıp olamay – yatıp raatlanmağa istey, çünki onıñ çoq turmağa ya oturmağa küçü yoqtır», – dep yazdı Ayşe Umerova Facebook saifesinde.
Amma böyle şaraitke baqmadan, Ayşeniñ aytqanına köre, onıñ babası ruhundan tüşmey ve halqqa destek köstergeni içün teşekkür bildire.
Rusiyeli FSB bu sene mayıs ayında İlmi Umerovğa qarşı «separatizm» maddesi boyunca cinaiy iş açtı. Kremlge boysunğan Qırım prokurorı Natalya Poklonskaya ayttı ki, o, ukrain ATR telekanalınıñ yayınında Rusiye topraq bütünligini bozuvına çağırğan edi.
Sağlıq alına baqmadan, Rusiyege boysunğan Aqmescitteki Kiyev rayon mahkemesi Umerovnıñ statsionar mahkeme-psihiatrik ekspertizadan keçmesi kerek olğanı aqqında qarar aldı.
Avgust 26-da, cuma künü Mustaqillik Meydanında İlmi Umerovğa destek olaraq aktsiya keçirmege planlaştıralar.
