Tahminen 10 kişi avgust 24-ke keçer gecesi merkeziy İtaliyada yüz bergen zelzele neticesinde elâk oldı. Bu, ilk malümattır, dep bildire Radio Svoboda.
Saat 3:30-da zelzele ortası paytaht Latsio regionında yerleşken Akkumoli ve Amatriçe şeerlerinde olğan, tahminen 6 magnitudalı şiddetli türtme yüz berdi.
Er biriniñ eali tahminen üç biñ kişiden ibaret olğan hususan bu eki meskün yeri eñ çoq zararlandı. Amatriçe şeer yolbaşçısı Serdjo Pirotstsiniñ aytqan sözlerine binaen, meskün yeriniñ yarısı viran etildi. Yerli akimiyet bildire ki, elâk olğanlarnıñ sayısı ziyade ola bile, omravlar tübünden zararlanğan kişilerniñ sesleri eşitile, olarnıñ arasında balalar bar. Akkumoli şeer yolbaşçısı qurtarıcı taqımlar pek yavaş kelgenine şikâyet ete.
Vatandaşlarnı qorçalama hızmetiniñ bildirgenine köre, viran etilgen rayonlarğa yollarnı ev omravlarınen blok etilgen tar soqaqlar ağırlaştıra.
Yerastı türtmeler paytahtnıñ şimaliy tarafındaki Marke ve Umbrii vilâyetlerinde de duyuldı. Romada 20 saniye devam etken eki türtme oldı. Adamlar soqaqlarğa çapıp, ev tışında tañğa qadar oturdı.
Umumen olaraq keçken gece seysmologlar merkeziy İtaliyada çeşit quvetli 18 yerastı türtmeni qayd etti. İşbu yerniñ seysmik seviyesi yüksektir. İtaliyada soñki şiddetli zelzele 2009 senesi L’Akvila şeerinde yüz berdi, o vaqıt 300-den ziyade kişi elâk oldı.
