Link açıqlığı

Avgust 24-te, çarşenbe künü Ukrainada Mustaqillik künü qayd etile. 25-ci doğğan kününde bütün devlet boyunca tantanalı merasimler keçirilecek.

Hususan, Ukraina paytahtında Taras Şevçenko ve Mihail Gruşevskiy, İnstitutskaya soqağındaki Nebesnaya Sotnâ qaramanları hatırasına bağışlanğan abidelerge ve ukrain devletiniñ diger belli erbaplarına bağışlanğan abidelerge çiçekler qoyulacaq. Bunen beraber, Kreşâtik ve Mustaqillik Meydanında ordu paradı keçirilecek, dep bildireler Kiyev şeer devlet memuriyetinde.

Resmiy merasimlerden ğayrı, Kiyev sakinleri ve şeer musafirlerini meraqlı ve faydalı programmalar, kontsertler, sergiler, festivaller ve yarışlar bekley.

Merasimler keçirilmesi sebebinden şeerniñ merkeziy rayonlarında avtomobil areketi sıñırlanacaq ve cemaat naqliyesi marşrutları deñişecek.

Qırım Rusiye tarafından işğal etilgen soñ yarımadada Ukraina Mustaqillik künü yarı gizli şekilde qayd etile. Avgust 24-ten eki kün evel Ukrain medeniyet merkeziniñ faali Leonid Kuzminni, Ukraina doğğan künü er angi aktsiyalar keçirilmesinden uzaq tursın, dep haberdar ettiler. Bunen beraber, Rusiyege boysunğan Aqmescit akimiyeti avgust 24-te haç yürüşiniñ keçirilecegini ilân ete.

Ukrain medeniyet merkezi Qırımda yarımada Rusiye tarafından işğal etilgen soñ teşkil etildi. Bu, cemaat teşkilâtı ola, onıñ maqsadı – ukrain halqınıñ tili ve medeniyetini saqlamaqtır. Merkez tesisçileri ögüne siyasiy maqsatlar qoymay.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG