Link açıqlığı

İşğal etilgen topraqlar boyunca Ukraina nazirligi, dünyanı ukrainlerni Qırımda qıynavlardan qorçalamağa çağıra


İlmi Umerov

Vaqtınca işğal etilgen topraqlar ve devlet içinde köçken şahıslar meseleleri boyunca Ukraina nazirligi dünya cemaatçılığını Ukraina vatandaşlarını işğal etilgen Qırım territoriyasında qorçalamağa çağıra. Bu aqta Rusiye ükümeti tarafından Aqmescitteki psihiatrik dispanserde mecburen tutulğan Meclis reisiniñ muavini İlmi Umerovnıñ işinen bağlı vaziyet munasebetinen müessiseniñ beyanatında bildirile.

«Vaqtınca işğal etilgen topraqlar ve devlet içinde köçken şahıslar meseleleri boyunca nazirlik Qırımda insan aqları bozulğanına qarşı qattı narazılıq bildire ve dünya cemaatçılığını Ukraina vatandaşlarını yarımadada işğalci ükümet tarafından yağılğan qıynavlardan qorçalamağa çağıra», – dep aytıla beyanatta.

Nazirlikte qayd eteler ki, Rusiye Federatsiyasınıñ areketleri insan aqları saasında halqara uquq esas qaidelerine zıt kele.

«Bundan sebep Ukraina Yuqarı Radası halq deputatlarınıñ Strasburgda Qıynavlarğa yol bermeme boyunca Avropa komitetine mütenasip arizanen muracaat etmeleri imkânı baqıla.

Ukraina Tışqı işler nazirliginde Meclis reisiniñ muavini İlmi Umerovnıñ sağlıq alı aqqında qasevet çekkenlerini bildirdiler. Avgust 22-de Ukraina Tışqı işler nazirliginiñ spikeri Maryana Betsa işğal etilgen Qırımnıñ rusiyeli ükümetinden zorbalıq usullarını deral toqtatmağa talap etti.

İlmi Umerovnıñ alı avgust 11-de Qırımda oña qarşı psihiatrik ekspertizanıñ belgilenmesi boyunca mahkemede yaramay oldı. Acele yardım kelip, kardiografik tedqiq yapqan soñ, Umerovnı Aqmescit hastahanesine infarkt havfı ile alıp kettiler. Sağlıq alına baqmadan, Rusiyege boysunğan Aqmescitteki Kiyev rayon mahkemesi Umerovnıñ statsionar mahkeme-psihiatrik ekspertizadan keçmesi kerek olğanı aqqında qarar aldı.

Şimdiki vaqıtta Meclis reisiniñ muavini Umerovnıñ sağlığı yaramaylaşa. Bu aqta Qırım.Aqiqatqa bergen izaatında onıñ qızı Ayşe bildirdi.

Umerovnıñ adliyecisi Mark Feygin ilân etti ki, onıñ imaye etilgen kişiniñ psihiatrik hastahanege keçirilmesine qıynav olaraq baqa. Umerovnıñ daa bir adliyecisi Nikolay Polozov bildirdi ki, imayeciler bir sıra müessiselerge arizalar berdi. Vesiqalarda qayd etile ki, Meclis reisiniñ muavini ekspertizağa qanunsız ketirilgen.

Rusiyeli FSB bu sene mayıs ayında İlmi Umerovğa qarşı «separatizm» maddesi boyunca cinaiy iş açtı. Kremlge boysunğan Qırım prokurorı Natalya Poklonskaya ayttı ki, o, ukrain ATR telekanalınıñ yayınında Rusiye topraq bütünligini bozuvına çağırğan edi.

XS
SM
MD
LG