İşğal etilgen Qırımda, Yedi Quyu rayonında büyük qaza yüz berdi. Rusiye Fevqulade vaziyetler nazirliginiñ Qırım baş idaresiniñ bildirgenine köre, Kefe-Keriç yolunda Minareli Şiban (Yerofeyevo) köyü rayonında beş maşna çatıştı, zararlanğanlar bar, olarnıñ sayısı bildirilmey.
«Qaza neticesinde zararlanğanlar bar. Rusiye Fevqulade vaziyetler nazirligi hadimleri zararlanğanlarnı bloktan azat etti», – dep qayd etile beyanatta.
Keriçke qadar yol keçken sene kurort mevsimi başlanmazdan evel tamir etilip başladı, bu ise, bu yönelişte areketni sıñırladı. Qırımda problema bar olğanını tanıdılar – tamirge ayırılğan bücet parasınıñ işke tüşürilmesi imkânsızdır.
İyül ayında Rusiye ükümetiniñ yolbaşçısı Dmitriy Medvedev yarımadada Qırım yollarınıñ keyfiyeti meselesi boyunca toplaşuv keçirdi.
Avgust 11-de Sudaq civarında yolda avtobus yarğa tüşti, yedi kişi elâk oldı, 13 adam zararlandı.
Avgust 14-te, aynı Yedi Quyu rayonında büyük qaza yüz berdi, bir insan elâk oldı.
Qırım işğal etilgen soñ yarımadada yol qazalarınıñ sayısı arttı. Qırım sakinleri yollarda maşnalarnıñ sayısı da artqanını, bunen beraber, meskün yerlerde ve şeerlerara yollarda yol areketi qaideleri bozuvlarını qayd ete.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
