Qırımda Meclis reisiniñ muavini İlmi Umerovnıñ işi etrafında olğan er şeyni halqqa bildirilmesi, işğal etilgen yarımadada Ukraina vatandaşlarlarına qarşı repressiyalar yapqan Rusiyege tesir etmege yardım ete bile. Böyle fikirni rusiyeli adliyeci Nikolay Polozov Qırım.Aqiqat Radiosınıñ saba yayınında bildirdi.
«Bu künleri taqiqatçı kelgen edi, İlmi Umerovnıñ soy-soplarına aytqan edi ki, nege olar bütün bu şamatanı kötere, nege bütün bu şeyler kerek, eger er şeyni yavaş ve raat yapmaq kerek. Eger FSB taqiqatçısı şamata kötermek kerekmey, dep aytsa, demek ki, aksine yapmaq kerek... Bellesem, Rusiye içinden tesir etmek içün diger mehanizmler yoqtır. Bunen beraber, uquq olmağan yerde uquqiy mehanizmler vastasınen. Başqa yol yoqtır», – dep qayd etti Polozov.
Ukraina Tışqı işler nazirliginde Meclis reisiniñ muavini İlmi Umerovnıñ sağlıq alı aqqında qasevet çekkenlerini bildirdiler. Avgust 22-de Ukraina Tışqı işler nazirliginiñ spikeri Maryana Betsa işğal etilgen Qırımnıñ rusiyeli ükümetinden zorbalıq usullarını deral toqtatmağa talap etti.
İlmi Umerovnıñ alı avgust 11-de Qırımda oña qarşı psihiatrik ekspertizanıñ belgilenmesi boyunca mahkemede yaramay oldı. Acele yardım kelip, kardiografik tedqiq yapqan soñ, Umerovnı Aqmescit hastahanesine infarkt havfı ile alıp kettiler. Sağlıq alına baqmadan, Rusiyege boysunğan Aqmescitteki Kiyev rayon mahkemesi Umerovnıñ statsionar mahkeme-psihiatrik ekspertizadan keçmesi kerek olğanı aqqında qarar aldı.
Şimdiki vaqıtta Meclis reisiniñ muavini Umerovnıñ sağlığı yaramaylaşa. Bu aqta Qırım.Aqiqatqa bergen izaatında onıñ qızı Ayşe bildirdi.
Umerovnıñ adliyecisi Mark Feygin ilân etti ki, onıñ imaye etilgen kişiniñ psihiatrik hastahanege keçirilmesine qıynav olaraq baqa. Umerovnıñ daa bir adliyecisi Nikolay Polozov bildirdi ki, imayeciler bir sıra müessiselerge arizalar berdi. Vesiqalarda qayd etile ki, Meclis reisiniñ muavini ekspertizağa qanunsız ketirilgen.
Rusiyeli FSB bu sene mayıs ayında İlmi Umerovğa qarşı «separatizm» maddesi boyunca cinaiy iş açtı. Kremlge boysunğan Qırım prokurorı Natalya Poklonskaya ayttı ki, o, ukrain ATR telekanalınıñ yayınında Rusiye topraq bütünligini bozuvına çağırğan edi.
