Rusiyege boysunğan işğal etilgen Qırımnıñ Yuqarı mahkemesi salı künü Qırımtatar Milliy Meclisi reisiniñ muavini Ahtem Çiygoznıñ «fevral 26 işi» boyunca toplaşuvnı devam etti.
Adliyeci Nikolay Polozovnıñ bildirgenine köre, toplaşuvğa üç zararlanğan kişi çağırldı.
«Üç kişiden episi – tertipni nezaret astında tutqan Ukraina sabıq militsionerleri ola. Şimdiki vaqıtta olar Rusiye Federatsiyası politsiyası hadimleri ola», – dep yazdı Polozov Twitterde.
Onıñ sözlerine köre, zararlanğanlarnıñ biri – Canköyden Pavel Petrov – añlattı ki, «yanımızğa Aqmescitke mahsus aletler aldıq: kaska, tayaq, qalqan, zırhlı jilet, amma avtobustan bunı çıqarmadıq: keregi yoq edi».
Qırım Rusiye tarafından işğal etilgen soñ yarımadada Rusiye uquq qoruyıcıları Ukraina topraq bütünligine qoltutqan ve Qırımnıñ şimdiki yolbaşçısı Sergey Aksönov yolbaşçılığında «Rus birligi» firqasınıñ faallerine qarşı çıqqan qırımtatar faallerini mahküm etmege başladılar.
İyül 20-de mahkeme qapalı toplaşuvda «fevral 26 işini» ekige böldi: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.
Ahtem Çiygoz mahkemede özüni qabaatlı tanımadı.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
