Link açıqlığı

Avgust 23-te Ukrainada Devlet bayrağı künü qayd etile. Devlet timsallerinden biri olğan Ukraina bayrağına bağışlanğan bayram 2004 senesinden başlap qayd etile.

Ukraina prezidenti Petro Poroşenko salı künü Kiyevde Sofiyskaya meydanında Devlet bayrağı köterilmesi tantanalı merasiminde iştirak etecek.

Aynı bu kün Herson vilâyetinde Geniçesk rayonındaki Novoalekseyevkadan Qırım ile memuriy sıñırğa qadar avto yürüş teşkil etilecek.

Yerli meclisler temsilcileri, cemaat erbapları «Çonğar» keçirüv noqtası civarında ukrain bayrağını açacaq. Bunen beraber faaller bayram üyle aşına toplaşacaq.

Gulnara Bekirovanıñ malümatına binaen, merasim yerli qırımtatar meclisler, cemaat teşkilâtları ve «Asker» vatandaşlar teşkilâtınıñ iştiraginen yerli memuriyet tarafından teşkil etile.

Qırım 2014 senesi Rusiye tarafından işğal etilgen soñ qıtaiy Ukraina ve yarımada arasında resmiy olaraq memuriy, aqiqaten ise, kerçek «sıñır» yerleşti. Memuriy sıñırda üç kiriş/çıqış nezaret noqtası çalışa: «Kalançak», «Çonğar» ve «Çaplinka».

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG