Avgust 23-te Qırım ile memuriy sıñır yanında Ukraina devlet bayrağı kününe bağışlanğan merasimler keçirilecek. Bu aqta Qırım.Aqiqatqa Geniçesk rayon devlet memuriyeti yolbaşçısınıñ muavini Gulnara Bekirova bildirdi.
Onıñ sözlerine köre, saba Novoalekseyevka köyunden ukrain bayraqlarınen avto yürüş çıqacaq.
Bundan soñ,saat 10-da Geniçesk şeeriniñ merkez meydanında bayram mitingi keçirilecek.
Bundan soñ merasimler iştirakçileri Qırım ile memuriy sıñırğa yol alacaq, ve «Çonğar» keçirüv noqtası civarında ukrain bayrağını açacaq. Bunen beraber faaller bayram üyle aşına toplaşacaq.
Gulnara Bekirovanıñ malümatına binaen, merasim yerli qırımtatar meclisler, cemaat teşkilâtları ve «Asker» vatandaşlar teşkilâtınıñ iştiraginen yerli memuriyet tarafından teşkil etile.
Qırım 2014 senesi Rusiye tarafından işğal etilgen soñ qıtaiy Ukraina ve yarımada arasında resmiy olaraq memuriy, aqiqaten ise, kerçek «sıñır» yerleşti. Memuriy sıñırda üç kiriş/çıqış nezaret noqtası çalışa: «Kalançak», «Çonğar» ve «Çaplinka».
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
