Link açıqlığı

Avgust 22-de, bazarertesi künü rusiyeli adliyeci Nikolay Polozov İlmi Umerovnı psihiatrik hastahanede ziyaret etkeni aqqında añlattı. Bu aqta Polozov Facebook saifesinde bildirdi.

Adliyeciniñ sözlerne köre, Qırımtatar Milliy Meclisi reis muavininiñ sağlığı alâ daa yerinde degil.

«Tedaviylenüvden keçken kardiologiya hastahane bölüginden FSB hadimleri tarafından psihiatrik klinikağa mecburen keçirilgen İlmi ağanıñ sağlığı alâ daa yerinde degil», – dep qayd etti Polozov.

Onıñ qayd etkenine köre, İlmi Umerovnıñ hastalıqları boyunca statsionar nezaret etüv içün şarait yoq.

Polozovnıñ sözlerine binaen,yaqında kelgen taqiqatçı Umerovğa ve onıñ soy-soplarına «qıçırmamağa, şamata kötermemege, ekspertiza keçireyik da, er şey yahşı olur», dep tevsiye etken.

«Ğaliba, bu FSB-nıñ noqta-i nazarıdır. Demek ki, aksine yapmaq kerektir, şamata kötermek, İlmi Umerovnıñ qanunsız taqip etilmesine qarşı imayesine daa çoq insan celp etmek, em Ukrainada, em de bütün dünyada», – dep ayttı Polozov.

Bazar künü İlmi Umerovnıñ soy-sopları onıñ sağlığı yaramay olğanını bildirdi.

Qırımda rusiyeli ükümet İlmi Umerovnı «separatizm» içün mahküm ete. İlmi Umerovnıñ alı avgust 11-de oña qarşı psihiatrik ekspertizanıñ belgilenmesi boyunca mahkemede yaramay oldı, onı Aqmescit hastahanesine infarkt havfı ile alıp kettiler. Avgust 18-de onı, adliyecilerniñ narazılığına baqmadan, mecburen psihonevrologik dispanserge keçirdiler.

Umerovnıñ adliyecisi Mark Feygin ilân etti ki, onıñ imaye etilgen kişiniñ psihiatrik hastahanege keçirilmesine qıynav olaraq baqa. Onıñ sözlerine köre, imayeciler FSB taqiqat organlarınıñ areketleri boyunca Strasburg şeerinde Qıynavlarğa qarşı Avropa komitetine muracaat etmege niyetlene.

Ukraina Tışqı işler nazirliginde Meclis reisiniñ muavini İlmi Umerovnıñ sağlıq alı aqqında qasevet çekkenlerini bildirdiler ve işğal etilgen Qırımnıñ rusiyeli ükümetinden zorbalıq usullarını deral toqtatmağa talap eteler. Hususan, bu aqta Twitter saifesinde Ukraina Tışqı işler nazirliginiñ spikeri Maryana Betsa yazdı.

«Memorial» rusiyeli uquq qorçalayıcı merkezinde Qırımtatar Milliy Meclisi reisiniñ muavini İlmi Umerovğa qarşı işğal etilgen Qırımda cinaiy taqipni qanunsız ve siyasiy sebeplerden olğanını ayttılar, çünki o, zorbalıq areketlerine çağırmay edi.

XS
SM
MD
LG