Rusiyede Federal Havfsızlıq hızmeti Tataristan Cumhuriyeti territoriyasında 5 Ukraina vatandaşı qanunsız narkotik alış-veriş yapqanında şeklenilip yaqalanğanını bildire. Bu aqta müessiseniñ regional idaresiniñ beyanatında söz yürsetile.
«Tataristan Cumhuriyetinde Rusiyeli FSB idaresi, terkibinde büyük miqdarda qaviy tesir etken sintetik narkotiklerniñ Qazanğa ketirilmesini teşkil etken Ukraina vatandaşları olğan cinayetçi taqımınıñ faaliyetini toqtattı», – dep yaza rusiyeli müessise.
FSB-niñ malümatına binaen, yaqalanğan ukrainler 19-30 yaşındalar. Müessisede bildirilgenine köre, yaqalanğan kişilerden, bunen beraber, olarnıñ tarafından teşkil etilgen sırlı yerlerden 2-den ziyade kilogram sintetik narkotik maddesi alındı, bu madde «spays» qarışma yapılması içün qullanıla.
FSB-de qayd ettiler ki, yaqalanğan kişiler pek büyük miqdarda narkotik alış-verişni qanunsız teşkil etüv aqqında madde boyunca cinayet yapqanlarında qabaatlanacaqtır.
Ukrain tarafı bu beyanatqa izaat daa bermedi.
Bundan evel, Ukraina Tışqı işler nazirligi vatandaşlarğa «Rusiyege ziyaretlerni planlaştırğanda bu devlette ola bilecek delilsiz yaqalanuv telükesini köz ögünde tutmağa» tevsiye etti.
