Link açıqlığı

Saatnıñ esas haberi

Aqmescit ava limanında uçaq seferleri lâğu etilip devam ete


Aqmescit ava limanında kütleviy şekilde uçaq seferleri lâğu etilip devam ete, seferler çoq saatqa keçiktirile. Bu aqta malümat ava limanı saytındaki online tabloda bildirile.

Ava limanı malümatına binaen, avgust 22-de, bazarertesi künü Moskva, Kazan, Kursk ve Voronej şeerlerine seferler lâğu etilgen.

Yekaterinburg şeerine uçaq saat 5:00-ten keçiktirile. Tabloda ilân etile ki, sefer saat 16:00-ğa qadar keçiktirilecek, bunen beraber, qayd etile ki, uçaq cedvel boyunca çıqacaq. Ava seferi Fly rusiyeli şirketi tarafında teşkil etile, onıñ seferleri keçken afta Aqmescit ava limanında kütleviy şekilde lâğu etilgen edi.

İşğal etilgen Qırımda seferlerniñ keçiktirilmesi iyül 18-de başlandı, o vaqıt «VİM AVİA» şirketiniñ yolcuları Aqmescit ava limanında bir künden ziyade seferni bekledi. Bunı tehnikiy meselelernen añlatqan ediler. Privoljskaya naqliye prokuraturasında bildirdiler ki, «VİM AVİA» şirketine qarşı daimiy ve çarter ava seferleriniñ kütleviy şekilde keçiktirilmesi içün memuriy uquq bozuvı aqqında iş açıldı.

Bu afta işğal etilgen Aqyarnıñ vaqtınca tayinlengen yolbaşçısı Dmitriy Ovsânnikov bildirdi ki, Aqmescit ava limanı imkânlarnıñ sıñırında çalışa ve bu Rusiyenen ava seferlerini telüke astına qoya.

2014 senesi mart ayında yarımada Rusiye tarafından işğal etilgen soñ, Qırım ava limanları Ukraina ükümetiniñ qararınen qapatıldı. O yerge ve o yerden er angi uçuşlar Ukraina qanunlarını ve halqara qaidelerni boza, bunıñ içün ava şirketleri Ukraina ve İKAO tarafından halqara sanktsiyalarğa oğray bile.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG