Kelecek afta Ukrainağa Amerika Qoşma Ştatlarınıñ yañı elçisi teşrif buyuracaq. Bunı Amerika elçihanesinde bildireler.
«AQŞ yañı elçisi Marie Yovanovitchni kelecek afta Ukrainada qarşılamağa azırlanamız», – dep qayd eteler Ukrainadaki AQŞ elçihanesinde.
AQŞ prezidenti Barack Obama Ukrainadaki elçi vazifesine Marie Yovanovitchniñ namzetini teklif etti. Bunı mayıs 18 künü Beyaz Saraynıñ matbuat hızmeti bildirgen edi.
Öz diplomatik karyerasında Yovanovitch Devlet kâtibiniñ yardımcısı vazifesinde çalıştı ve Skandinaviya, Baltik ve Orta Avropa memleketlerinen eki taraflama munasebetler boyunca yardımcı edi. Bundan da ğayrı o Ermenistanda (2008-2011 yıllarında) ve Qırğızistanda (2005-2008 yıllarında) elçi olaraq buluna edi.
Ukrainadaki Amerika Qoşma Ştatlarınıñ şimdiki elçisi Geoffrey Pyatt ise Obama tarafından Yunanistandaki AQŞ elçisi vazifesine teklif etildi. Pyatt Ukrainada aman-aman üç yıl çalışa – 2013 sensi yazdan berli.
