Qırımtatar Milliy Meclis reisiniñ muavini İlmi Umerovnıñ evinde avgust 22, bazarertesi künü dua keçirilecek. Bunı İlmi Umerovnıñ qızı Ayşe öz Facebook saifesinde ilân etti.
«Bazarertesi, avgust 22 künü, Qırımtatar Milliy Meclis reisiniñ muavini İlmi Umerovnıñ evinde (Bağçasaray şeeri, Lazurnaua soq., 67 adresi boyunca) ananeviy dua keçirilecek. Qırımtatar halqı kene öz birligini ve biri birine destegini köstermek kerek. Bizim mabuslarımız ve qaçırılğanlarımıznıñ azat etilmeleri içün, toplaşıp, dua etmelimiz!» – yazdı Ayşe Umerova.
Duanıñ keçirilecegi aqqında Qurultaynıñ merkeziy saylav komissiya yolbaşçısı Zair Smedlâyev te haber ete.
«Qırımtatarlar nevbetteki kere Yüce Rabbige dua etip, siyasiy mabuslarnıñ yaqın zamanda azat etilmesi, qaçırılğan ve ğayıp olğanlarnıñ tapılması, ailelerniñ ğayırdan birleşmesini yalvaracaqlar ve er kesge barışıq, sağlıq ve amanlıq tileycekler», – dep yazdı Facebook saifesinde Smedlâyev.
Qırımtatar Milliy Meclis reisiniñ muavini İlmi Umerovnı işğal etilgen Aqmescitte delihanede tutalar. Avgust 16 künü Rusiye FSB hadimleri onı mecburen anda psihiatrik ekspertizanıñ keçirilmesi içün alıp kettiler.
İlmi Umerovnıñ qızı Ayşe babasına tek yaqınlarınen ve advokatlarnen ve tek belli saatlerde körüşmege ruhset berilgenini haber etken edi.
Qırımda uquq qoruyıcılar İlmi Umerovğa qarşı Rusiye Cinaiy kodeksiniñ 280.1 maddesi (separatizm) boyunca cinaiy iş açtı.
İlmi Umerovnıñ alı avgust 11-de Qırımda oña qarşı psihiatrik ekspertizanıñ belgilenmesi boyunca mahkemede yaramay oldı. Acele yardım kelip, kardiografik tedqiq yapqan soñ, Umerovnı Aqmescit hastahanesine infarkt havfı ile alıp kettiler. Bundan soñ Rusiyege boysunğan Aqmescitteki Kiyev rayon mahkemesi Umerovnıñ statsionar mahkeme-psihiatrik ekspertizadan keçmesi kerek olğanı aqqında qarar aldı.
İmayeciler bu mahkeme qararına qarşı şikâyet etti.
«Memorial» rusiyeli uquq qorçalayıcı merkezinde Qırımtatar Milliy Meclisi reisiniñ muavini İlmi Umerovğa qarşı işğal etilgen Qırımda cinaiy taqipni qanunsız ve siyasiy sebeplerden olğanını ayttılar, çünki o, zorbalıq areketlerine çağırmay edi.
