Ukraina Tış işler nazirligi işğal etilgen Qırımğa halqara nezaretçilerniñ yiberilmesini Rusiyeden talap ete. Bunı Twitter saifesinde avgust 20 cumaertesi künü TİN matbuat kâtibi Mariana Betsa yazdı ve böyle şekilde Milliy Meclis reisiniñ muavini İlmi Umerovnıñ mecburen Aqmescitteki psihiatrik statsionrğa yerleştirilmesi aqqında haberni izaatladı.
«İşğalciler qırımtatarnı qıynamağa devam eteler. Olarnıñ esas maqsadı – qorqutmaq, sındırmaq, Qırımdan sıqıp çıqarmaq», – dep qayd ete Mariana Betsa.
«İşğalci akimiyetten halqara uquq qorçalayıcı teşkilâtlarğa Qırım Muhtar Cumhuriyetinde insan aqlarınıñ vaziyetini nezaret etmege ruset bergenlerini talap etemiz», – dep qoştı Ukraina Tış işler nazirliginiñ spikeri.
FSB hadimleri avgust 16 künü Qırımtatar Milliy Meclis reisiniñ muavini İlmi Umerovnı mecburen, hastahaneden alıp, Aqmescitteki Roza Lüksemburg soqağında yerleşken psihiatrik dispanserge ekspertiza içün ketirdiler. İlmi Umerovnıñ qızı Ayşe babasına yaqınlarınen körüşmege yasaq etilgenini haber etken edi. Bundan da ğayrı, ondan ilaçlarnı aldılar.
Qırımda uquq qoruyıcılar İlmi Umerovğa qarşı Rusiye Cinaiy kodeksiniñ 280.1 maddesi (separatizm) boyunca cinaiy iş açtı.
İlmi Umerovnıñ alı avgust 11-de Qırımda oña qarşı psihiatrik ekspertizanıñ belgilenmesi boyunca mahkemede yaramay oldı. Acele yardım kelip, kardiografik tedqiq yapqan soñ, Umerovnı Aqmescit hastahanesine infarkt havfı ile alıp kettiler. Bundan soñ Rusiyege boysunğan Aqmescitteki Kiyev rayon mahkemesi Umerovnıñ statsionar mahkeme-psihiatrik ekspertizadan keçmesi kerek olğanı aqqında qarar aldı.
İmayeciler bu mahkeme qararına qarşı şikâyet etti.
«Memorial» rusiyeli uquq qorçalayıcı merkezinde Qırımtatar Milliy Meclisi reisiniñ muavini İlmi Umerovğa qarşı işğal etilgen Qırımda cinaiy taqipni qanunsız ve siyasiy sebeplerden olğanını ayttılar, çünki o, zorbalıq areketlerine çağırmay edi.
