Link açıqlığı

Ukraina BM diqqatını Putinniñ ğayri uquqiy Qırım ziyaretine celp etti


Vladimir Putin Qırımda

Ukraina Birleşken Milletler Teşkilâtınıñ diqqatını Rusiye prezidenti Vladimir Putinniñ, Kyiv ile uyğunlaşmayıp, Ukrain topraqlarına, tam olaraq, işğal etilgen Qırımğa yapqan ziyaretine celp etti. Bunı BM yanındaki Ukrain temsilciligi bildirdi.

Ukrainanıñ BM yanındaki daimiy temsilcisi Volodimir Yelçenko cuma künü BM baş kâtibiniñ birinci muavini Jan Eliasson ile körüşti ve olar «Putinniñ uquqsız Qırımda bulunğanını» muzakere ettiler, dep temsilcilikniñ Twitter saifesinde haber etile.

Bunen beraber bildirile ki, Yelcenko rus arbiy quvvetleriniñ rus-ukrain sıñırına yaqınlaşqanı, Qırım ve Donbasta çoqlaşqanına da Eliassonnıñ diqqatını celp etti.

Bundan ögüne Kyivte Ukraina tış işler nazirligi Rusiye prezidentiniñ Ukrainada uyğunlaşmasız bulunğanına qatiyen qarşı itiraz bildirdi.

«Ukraina Tış işler nazirligi Rusiye devlet adamlarınıñ mustaqil Ukrainanıñ topraqlarına ruhsetsiz kelmeleri mumkün olmağanını defalarca ifade ete edi. Ukrainanıñ dünyada tanılğan sıñırlarına Qırım Muhtar Cumhuriyeti ve Sevastopol kire. Rus memurlarnıñ Ukrainağa yapqan böyle «ziyaretlerini» «devlet içinde yapılğan areketler» kibi tanıtmaq ıntıluvı küçsüzdir», – beyan eteler Kyivte.

Rusiye Tış işler nazırligine bu aqta itiraz mektübü yollanılğanı haber etile.

Bundan ögüne cuma künü Rusiye prezidenti Vladimir Putin onıñ devleti tarafından işğal etilgen Qırımnı ziyaret etip, Ukrainağa qarşı bir sıra beyanat seslendirdi. Ayrıca, o «sabotaj ıntıluvı» aqqında iddianı tekrar seslendirdi. Onıñ sözlerine köre, bunı Qırımda Kyiv yapmağa niyetli edi. Putin Ukrain akimiyetini «provokatsiyalarda» ve işğal etilgen Donbass bölgelerinde vaziyetniñ tüzelmesi içün qabul etilgen «Minsk añlaşmalarınıñ yapmağa istemegeninde ya da olamağanında» qabaatladı.

Ukrain tarafı qayd ete ki, Qırımda «ukrain diversantlarınıñ yaqalanması» aqqında ikâye Rusiye tarafından provokatsiya olaraq çıqa ve, kerginlikni arttırıp, Minsk añlaşmalarını devamlı yerine ketirmemek içün tarqatıla.

XS
SM
MD
LG