Miiliy Meclis reisiniñ muavini İlmi Umerovnıñ aile azaları ve advokatı onı avgust 19, cuma künü hastahanede ziyaret etip oldılar. Bunı İlmi Umerovnıñ qızı Ayşe öz Facebook saifesinde haber ete.
«Körüşmege ruhset tek bizge – aile azalarına ve advokatlarğa berildi. Lâkin ancaq belgilengen saatlerde – kündüz saat 11.00-13.00 arasında ve aqşam 17.00-18.00 arasında. Bu vaqıtta onı körmege, aşatmağa, onnen qonuşmağa mümkün. Bu maqsatlar içün anda ayrı oda bar, o yerge bütün hastalarnıñ ziyaretçileri kele», – dep yazdı Ayşe Umerova.
Onıñ sözlerine köre, babası hastahanede pişirilgen aşlarnı aşamağa razı olmay, tek tuvğanlarnıñ ketirgen yemeklerini aşay. İlmi Umerovke mıtlaqqa kerek olğan ilâçlar öyle de emşire de qala.
«Bizlerni eñ çoq raatsız etken – onıñ ilâçları. Bügünki künde, yerli terapevt ve kardiologlarnen mesleatlar keçirilgen soñ, oña öz ilaçlarını içmege ruhset berdiler. Olar episi bir emşirede qaldırıla (telükesizlik tedbirlerinden, çünki ruhiy hastalar kirip, ilâçlarnı qapmaq mümkünler), bu sebepten oña er saba künlük norması berile ve o olarnı yanında taşıy», – dep yaza Ayşe Umerova.
O şunı da bildirdi ki, İlmi Umerovnen subetleşeler ve nezaret eteler. Lâkin iç bir medikamentoz usullarnen psihiatrik ekspertizanı delihane hadimleri qullanmaylar.
Kün evelsi işğal etilgen Aqmescitteki delihane hadimleri Milliy Meclis reisiniñ muavini İlmi Umerovke onıñ advokatı Edem Semedlâyevni yibermediler.
FSB hadimleri avgust 16 künü Qırımtatar Milliy Meclis reisiniñ muavini İlmi Umerovnı mecburen, hastahaneden alıp, Aqmescitteki Roza Lüksemburg soqağında yerleşken psihiatrik dispanserge ekspertiza içün ketirdiler. İlmi Umerovnıñ qızı Ayşe babasına yaqınlarınen körüşmege yasaq etilgenini haber etken edi. Bundan da ğayrı, ondan ilaçlarnı aldılar.
Qırımda uquq qoruyıcılar İlmi Umerovğa qarşı Rusiye Cinaiy kodeksiniñ 280.1 maddesi (separatizm) boyunca cinaiy iş açtı.
İlmi Umerovnıñ alı avgust 11-de Qırımda oña qarşı psihiatrik ekspertizanıñ belgilenmesi boyunca mahkemede yaramay oldı. Acele yardım kelip, kardiografik tedqiq yapqan soñ, Umerovnı Aqmescit hastahanesine infarkt havfı ile alıp kettiler. Bundan soñ Rusiyege boysunğan Aqmescitteki Kiyev rayon mahkemesi Umerovnıñ statsionar mahkeme-psihiatrik ekspertizadan keçmesi kerek olğanı aqqında qarar aldı.
İmayeciler bu mahkeme qararına qarşı şikâyet etti.
«Memorial» rusiyeli uquq qorçalayıcı merkezinde Qırımtatar Milliy Meclisi reisiniñ muavini İlmi Umerovğa qarşı işğal etilgen Qırımda cinaiy taqipni qanunsız ve siyasiy sebeplerden olğanını ayttılar, çünki o, zorbalıq areketlerine çağırmay edi.
