Link açıqlığı

İşğal etilgen Aqmescitte rus imperatoriçesi II Yekaterinanıñ büyük eykeli açıldı. Abideniñ açılmasını Kremlin kontrolü astındaki Qırım akimiyeti ilân ete edi, lâkin merasimniñ künü bir qaç kere deñiştirildi.

Eykelniñ tantanalı açılış merasiminde Moskva tarafından tainlengen Qırım yolbaşçısı Sergey Aksönov ve Qırım spikeri Vladimir Konstantinov iştirak ettiler.

Konstantinov qay etti ki, rus imperatoriçesi Qırımnı Rus İmperiasınıñ terkibine qoşqan soñ «ulu» unvanına nail oldı.

10 metr yükseklikte Yekaterinanıñ abidesi Aqmescitniñ Yekaterin bağçasında yerleştirildi. Aqmescitte 1921 senesine qadar turğan II Yekaterinanıñ eykelini ğayırdan tiklemek teşebbüsinen 2015 senesi «Rus birligi» cemaat teşkilâtı çıqqan edi. Abideniñ qurulmasına bütün Rusiyeden para toplanıla edi, mahsus bank esabı açılğan edi.

Abideniñ temelini Aqmescitniñ merkezinde 2016 senesi aprel ayınıñ ortasında hristian adetine köre taqdis ettiler. Eykelniñ özüni iyün 23 künü pekitip başladılar. Eykelni Moskvağa yaqın yerleşken Jukovskiy şeerinden ketirdiler. Anda o «Lit Art» kombinatında yapılğan edi. Moskva kontrolü astındaki Aqmescit akimiyeti II Yekaterinanıñ abidesi iyül aynıñ soñunda açılacağını ilân etken edi, amma öyle olmadı.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG