Link açıqlığı

Saatnıñ esas haberi

Rusiyedeki muhalifet fırqası işğal etilgen Qırımda teşviqattan vazgeçti


Ukrainanıñ yasağından soñra Rusiyedeki Milliy Azatlıq Fırqasınıñ (PARNAS) vekilleri Rusiye tarafından ilhaq etilgen Qırımda saylavaldı teşviqatını keçirmeycek oldı.

«Ukrainanı diñlermiz ve halqara uquq çerçevesinde areket etecekmiz», – dep buyurıla firqanıñ Krasnodar regional bolüginiñ «Vkontakte» saifesinde.

Bir kün evelsi Ukraina Tış işler nazirligi PARNAS vekillerine Qırımda saylavaldı teşviqatını keçirmege razılıq bermedi. Nazirlikniñ siyasiy departament müdiri Oleksiy Makeyev Qırım.Aqiqat portalına añlatqanı kibi, Ukrain toprağında başqa devletniñ millet vekillerini saylamaq mumkün degil.

«İşğal etilgen Qırım topraqlarında teşviqatnıñ keçirilmesine Ukraina iç bir ruhset berip olamay», − dep qayd etti ukrain Tış işler nazirliginiñ temsilcisi.

Avgust 13 künü Krasnodar vilâyetinden PARNAS fırqasınıñ millet vekil namzetleri Rostov-na-Donu şeerindeki Ukraina baş konsullığına muracaat etip, teşviqat alıp barmaq içün Qırımğa tranzit vizalarını sorağan edi.

Bundan ögüne uquq qorçalayıcılar rus vatandaşlarına Qırımğa barmazdan ögüne ukrain akimiyetinden razılıq almağa tevsiye ete ediler, çünki, halqara uquqqa binaen, yarımada «işğal etilgen topraq» olaraq sayıla ve onıñ ruhsetsiz ziyaret etilmesi içün Ukrainada cinaiy mesüliyetlik bardır.

Rusiyede Devlet Dumasına saylavlar sentâbr 18 künü keçirilecektir.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG