Link açıqlığı

Rusiye Bağ ve alâqa nazirligi «Bağ aqqında» qanunğa deñişmeler azırladı. Olarğa binaen, İnternetniñ rus tilindeki qısmı bütünley Nazirlikniñ nezareti altına keçmeli. Bunı Rusiyedeki «Vesti» gazetası bildire.

Müellifler qayd eteler ki, bu deñişmeler «rusiye milliy segmentniñ bütünlügini, devamlı, stabil, istiqrarlı ve qorunğan işini» teminleycek.

«Deñişmeler kritik infrastruktura kibi adlanğan añlamnı kirseteler. Onıñ elementleri sırasına milliy domen bölgesi, onıñ hızmetine kerek olğan infrastruktura, trafik deñişüv noqtalar sisteması ve rusiye milliy segmentniñ bütünlügini, devamlı, stabil, istiqrarlı ve qorunğan işini teminleycek sözde devlet informatsion sisteması kire. Qanun leyhasına binaen, bu sistema muhtar sistemalar, IP-adresler ve internet deñişüv noqtaları aqqında malümatnı toplamaq kerek», – dep buyurıla bildirüvde.

Böyle noqtalarnıñ resmiy saipleri ancaq rusiyedeki tüzel kişiler olmaq mumkünler. Gazeta öz menbaalarına atıf ile bildire ki, deñişmeler cedveli avgust 18 künü Bağ ve alâqa naziriniñ muavini Aleksey Sokolov, Rusiye Prezidentiniñ mesleatçısı German Klimenko ve «Rostelekom» devlet şirketi yolbaşçılarınıñ iştiraginen keçken toplaşuvda muzakere etildi.

Deñişmeler milliy ru ve рф domenlerine de toqunmaq mumkünler. Bügünki künde olarnı İnternet ağınıñ milliy domen koordinatsion merkezi idare ete. Qanun leyhasına binaen, olarnıñ idarecisi ancaq Bağ ve alâqa nazirligi tarafından tesis etilgen tüzel kişi ola bilecek.

Ru ve рф domenlerini idare etken Milliy domen koordinatsion merkezi devlet müessiseleriniñ nezareti altına keçe bilecegi aqqında kün evelden «Kommersant» gazetası da haber ete edi. Neşirniñ menbaalırından biri bildirdi ki, «rus internetiniñ muhtar sisteması aqqında qanun leyhasında tertiplengen yapılışnıñ faydasına» mevcut merkezni «kerçekten de yoq etmege» teklif etile.

Yaqında resmiy Rusiye uquqiy malümat portalında FSB emiri yerleştirildi. Emir internet qullanıcılarnıñ mesajlarına şifrelerni çezmek içün kerekli malümatnı bu müessisege teslim etilmesiniñ tertibini añlata.

XS
SM
MD
LG