Türkiye şarqındaki şeerlerde politsiya bölükleri yanında yüz bergen eki patlav neticesinde altı kişi elâk oldı, tahminen 160 adam yaralandı.
Devlet ükümetiniñ ilân etkenine köre, birinci patlav avgust 18-de saba Van şeerinde yüz berdi – minalı avtomobil patladı. Daa bir maşna Elâzıg şeerinde patlatıldı.
Eki şeer akimiyeti patlav azırlavında «Kurdistan iş partiyası» yasaq olunğan teşkilâtını qabaatlay, amma ücüm içün mesüliyetni kimse boynuna almadı.
Van şeeri gubernatorınıñ muavini Mehmet Parlak ilân etti ki, minalı avtomobilni qoyğan «silâlı kişi» yaqalandı ve sorğuğa çekildi.
Bu vaqıtqa qadar Van ücüm obyekti degil edi, Türkiye şarqında ateş toqtatılması aqqında añlaşma 2015 senesi bitkenine baqmadan. Eñ çoq ücüm yaqındaki Diyarbakır şeerinde yüz bergen edi, hususan avgust 15-te sekiz kişi avtomobil patlavı neticesinde elâk oldı.
«Kurdistan iş partiyası» 1984 senesi regionnıñ mustaqilligi içün silâlı küreşni ilân etti, o vaqıttan berli zorbalıq neticesinde 40000-den ziyade kişi elâk oldı.
