Qırımda «separatizm» içün Rusiye ükümeti tarafından mahküm etilgen İlmi Umerovnıñ psihiatrik ekspertizadan keçirilüvi onıñ bedence yoq etilmesi içün qullanıla bile. Böyle fikirni Qırımtatar Qurultayı Merkeziy saylav komissiyasınıñ reisi Zair Smedlâyev bildirdi.
«İlmi Umerovnıñ sağlıq alına baqmadan, ve mahkeme qararı işke tüşürilmegenine baqmadan, FSB hadimleri onı psihiatrik ekspertizadan keçirmek içün statsionar rejim müessisesine alıp kete. Er alda, onı ceza psihiatriyası qullanılmasınen bedence yoq etmege isteyler», – dep yazdı o Facebook saifesinde.
Qırımda uquq qoruyıcılar İlmi Umerovğa qarşı Rusiye Cinaiy kodeksiniñ 280.1 maddesi (separatizm) boyunca cinaiy iş açtı.
İlmi Umerovnıñ alı avgust 11-de Qırımda oña qarşı psihiatrik ekspertizanıñ belgilenmesi boyunca mahkemede yaramay oldı. Acele yardım kelip, kardiografik tedqiq yapqan soñ, Umerovnı Aqmescit hastahanesine infarkt havfı ile alıp kettiler. Bundan soñ Rusiyege boysunğan Aqmescitteki Kiyev rayon mahkemesi Umerovnıñ statsionar mahkeme-psihiatrik ekspertizadan keçmesi kerek olğanı aqqında qarar aldı.
İmayeciler bu mahkeme qararına qarşı şikâyet etti.
Avgust 18-de Rusiye FSB hadimleri İlmi Umerovnı psihiatrik ekspertiza keçirmek maqsadınen Aqmescit hastahanesinden alıp çıqardı.
«Memorial» rusiyeli uquq qoruyıcı merkezinde Qırımtatar Milliy Meclisi reisiniñ muavini İlmi Umerovğa qarşı işğal etilgen Qırımda cinaiy taqipni qanunsız ve siyasiy sebeplerden olğanını ayttılar, çünki o, zorbalıq areketlerine çağırmay edi.
