Link açıqlığı

Saatnıñ esas haberi

FSB İlmi Umerovnı psihekspertiza keçirmek içün hastahaneden alıp çıqardı – Celâl


Avgust 18-de, cumaaqşamı künü Rusiye FSB hadimleri Meclis reisiniñ muavini İlmi Umerovnı psihiatrik ekspertiza keçirmek maqsadınen Aqmescit hastahanesinden alıp çıqardı, o yerde Umerov tedaviyenüvden keçe. Bu aqta Meclis reisiniñ birinci muavini Nariman Celâl bildirdi.

«İlmi Umerovnı öyle de «hastahaneden çıqardılar» ve şimdiki vaqıtta FSB idaresi hadimi onı psihiatrik dispanserge alıp kete», – dep yazdı o Facebook saifesinde.

Adliyeci Nikolay Polozov Twitterde yazdı ki, «İlmi Umerovnıñ sağlığı yaramay olğanına baqmadan, FSB hadimleri bugün onı qanunsız psihiatrik statsionarğa keçirmege niyetlene».

İlmi Umerovnıñ alı avgust 11-de Qırımda oña qarşı psihiatrik ekspertizanıñ belgilenmesi boyunca mahkemede yaramay oldı. Acele yardım kelip, kardiografik tedqiq yapqan soñ, Umerovnı Aqmescit hastahanesine infarkt havfı ile alıp kettiler. Bundan soñ Rusiyege boysunğan Aqmescitteki Kiyev rayon mahkemesi Umerovnıñ statsionar mahkeme-psihiatrik ekspertizadan keçmesi kerek olğanı aqqında qarar aldı.

İmayeciler bu mahkeme qararına qarşı şikâyet etti.

Qırımda uquq qoruyıcılar İlmi Umerovğa qarşı Rusiye Cinaiy kodeksiniñ 280.1 maddesi (separatizm) boyunca cinaiy iş açtı.

«Memorial» rusiyeli uquq qoruyıcı merkezinde Qırımtatar Milliy Meclisi reisiniñ muavini İlmi Umerovğa qarşı işğal etilgen Qırımda cinaiy taqipni qanunsız ve siyasiy sebeplerden olğanını ayttılar, çünki o, zorbalıq areketlerine çağırmay edi.

XS
SM
MD
LG