Link açıqlığı

Saatnıñ esas haberi

Qırım Muhtar Cumhuriyeti prokuraturası «rusiyeli Qırım» ile harita boyunca işni taqiq etmege devam ete


Qırım Muhtar Cumhuriyeti prokuraturası Coca-Cola şirketiniñ «rusiyeli Qırım» ile harita boyunca işni taqiq etmege devam ete. Bu aqta Qırım Muhtar Cumhuriyeti prokurorınıñ muavini Petro Kovalenko bildirdi.

«İyül 12-de esnas boyunca yolbaşçı-prokuror Coca-Cola ukrain temsilciliginiñ uquq mesleatçısını sorğuğa çekti, qaysı biri bildirdi ki, şirket reklamasında Qırım yarımadasınıñ Rusiye Federatsiyası terkibinde kösterilmesi – Coca-Cola şirketiniñ rusiyeli ofisiniñ yapqan işidir», – dep ayttı Kovalenko LİGA.net agentligine bergen intervyusında.

2015 senesi dekabr 30-da Coca-Cola şirketiniñ rusiyeli temsilciligi «Vkontakte» içtimaiy ağında Rusiye Federatsiyası haritasını Qırımsız, Kuril adalarısız ve Kaliningradsız derc etti. Rusiyeli qullanıcılar kütleviy şekilde narazılıq bildirmege başlağan soñ, yanvar 5-te saba şirket Qırım Rusiye toprağı olaraq qayd etilgen yañı haritanı derc etti ve afu soradı.

Bu vaziyetke kütleviy haber vastaları diqqat ayırğan soñ, bu mevzu boyunca bütün beyanatlar ve izaatlar silindi.

İçtimaiy ağlar ukrain qullanıcıları bundan çorlandı, çoqusı Coca-Cola şirketiniñ mahsulatını satın almamaq çağırdı. Bundan soñ Coca-Cola bu haritanı öz «VKontakte» ağındaki saifesinden sildi.

Bu sebepten içtimaiy ağlarnıñ Qırım işğaline qol tutqan Rusiye qullanıcıları şirket ukrain tarafınıñ mevamına qol tutqanı içün çorlandı ve mahsulatqa Rusiyede boykot bildirdi.

Coca-Cola şirketiniñ ukrain temsilciligi Qırımnı Rusiye qısmı olaraq aks etken haritanıñ derci içün afu soradı.

2016 senesi yanvar 7-de Coca-Cola şirketiniñ baş ofisi yolbaşçısı Keyt İrvin Ukrainadan resmiy şekilde afu soradı.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG