Link açıqlığı

Celâl: Umerovnıñ ciddiy yürek problemaları bar, FSB onı hastahaneden çıqarmağa tırışa


İlmi Umerov

Ekimler Qırımtatar Milliy Meclisi reisiniñ muavini İlmi Umerovnıñ ciddiy yürek problemaları bar olğanını belgiledi. Buña baqmadan, rusiyeli FSB, Umerovnıñ mahkeme-psihiatrik ekspertizadan keçmesi içün, onıñ hastahaneden çıqmasını talap etmege devam ete.

Bu aqta Meclis reisiniñ birinci muavini Nariman Celâl Facebook saifesinde İlmi Umerovnı hastahanede ziyaret etkeninden soñ yazdı.

«Tıbbiy talil neticeleri quvandırmay. İlmi ağanıñ yüreknen bağlı ciddiy problemaları bar... Şimdiki vaqıtta o, mahsus tıbbiy yardımğa muhtac. Bu arada, elde etilgen malümatqa binaen, FSB idaresi taqiqatçısı, Umerovnıñ işi boyunca apellâtsiya mahkemesiniñ qararı qabul etileceginden evel onı hastahaneden çıqarmağa ve aynı vaqıtta onı mahkeme-psihiatrik ekspertizadan keçirmek içün mahsus psihiatrik dispanserge ketirmege ep tırışa. O yerde oña kerekli tıbbiy yardım kösterilecekmi, belli degil», – dep yazdı Celâl.

Nariman Celâl qayd etti ki, ekspertiza yerine, İlmi Umerovnıñ sağlığına ilâc vastasınen ya da diger usulnen tesir etile bile.

«Uquq qoruyıcılar İlmi Umerovnıñ ruhiy sağlığını yaramay köstermege, yani, bütün onıñ aytqan sözlerini ve siyasiy qıymet kesüvlerini sağlam olmağanını köstermege tırışa, bunen beraber, belki, onı sentâbr ayınıñ ortasında keçirilecek saylavlarnıñ yekünlenecegine qadar etraf müitten ayırmağa tırışa», – dep qayd etti Meclis reisiniñ muavini.

Qırımtatar Milliy Meclisinde Rusiye Federal havfsızlıq hızmeti Aqmescitteki hastahane ekimlerini sıqıştırğanı aqqında malümatnı teşkereler. Bu aqta bundan evel Meclis reisi Refat Çubarov bildirgen edi.

İlmi Umerovnıñ rusiyeli adliyecisi Mark Feygin matbuat konferentsiyası devamında qayd etti ki, onıñ imaye etken kişi, mahküm etilgen olsa da, sağlıq alı sabebinden cezasını toldurıp olamaz.

Bu mesele boyunca rusiyeli uquq qoruyıcı organlarınıñ izaatı yoq.

Qırımda uquq qoruyıcılar İlmi Umerovğa qarşı Rusiye Cinaiy kodeksiniñ 280.1 maddesi (separatizm) boyunca cinaiy iş açtı.

İlmi Umerovnıñ alı avgust 11-de Qırımda oña qarşı psihiatrik ekspertizanıñ belgilenmesi boyunca mahkemede yaramay oldı. Acele yardım kelip, kardiografik tedqiq yapqan soñ, Umerovnı Aqmescit hastahanesine infarkt havfı ile alıp kettiler. Bundan soñ Rusiyege boysunğan Aqmescitteki Kiyev rayon mahkemesi Umerovnıñ statsionar mahkeme-psihiatrik ekspertizadan keçmesi kerek olğanı aqqında qarar aldı.

XS
SM
MD
LG