Link açıqlığı

Saatnıñ esas haberi

Çubarov – köçkenlerge ev programmaları içün degil de, Qırımnıñ işğalden azat etilmesi içün


Qırımtatar Milliy Meclisi reisi, Ukraina Yuqarı Radası deputatı Refat Çubarov vaqtınca işğal etilgen topraqlardan köçkenlerni evlernen teminleme boyunca ayrı programmalarnıñ teşkil etilmesine qarşı çıqtı. Bu aqta o, Kiyevde keçirilgen matbuat konferentsiyasında, rusiyeli apishanelerniñ sabıq mabusları Yuriy İlçenko ve Gennadiy Afanasyevni evlernen teminlev aqqında sualge cevap berip, ayttı.

Refat Çubarovnıñ qayd etkenine köre, böyle programmalarnıñ teşkil etilmesi ve olarnıñ ömürge keçirilmesi, Qırım ve Donbassnıñ işğal etilgen toprağınıñ tamamınen ğayıp etmesini tasdıqlaycaq.

«Bu topraqlarnı qaytarmaq içün planlar işlep çıqarsınlar dep, (ukrain ükümetine – QA) muracaat etmek kerek», – dep ayttı Çubarov.

Onıñ qayd etkenine binaen, işğal etilgen ukrain topraqlarınıñ qaytarılması Ukrainanıñ Kiyevge boysunğan territoriyasına köçmege mecbur olğanlarnıñ ev meselelerini çezmege yardım eter edi.

Çubarov ayttı ki, o, aynı köçkenler kibi, Qırımnıñ işğalden azat etilmesini bekley. «Öz daireme qaytıp, anamnı körip olurım», – dep qoştı o.

Refat Çubarovnıñ fikrince, işğal etilgen topraqlarnıñ qaytarılması boyunca planlar mecburen köçkenlerge devlet tarafından yardım kösterilecegini ihtimal ete. «Bazı yataqhanede bir oda yeterlidir, bazı da işke kirmege yardım etmek mümkün», – dep ayttı Qırımtatar Milliy Meclisi reisi.

Onıñ qayd etkenine köre, mecburen köçkenlerni evlernen teminlev boyunca devletniñ er angi qararı tenqit etilecektir.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG