Keçirilmesi Aqmescitte avgust 20-ge planlaştırılğan «Aldatılğan Qırım» mitinginiñ teşkilâtçısı İlya Bolşedvorov Rusiye prezidenti Vladimir Putinni narazılıq aktsiyasını ziyaret etmege çağıra.
Bu aqta o Facebook saifesinde yazdı.
«Onı, Qırım Cumhuriyetindeki kerçek vaziyetni añlamaq, adamlarnı kerçekten de raatsızlağan meselelerni diñlemek, ve Aksönov Sergey Valeryeviç ve onıñ «dostane» taqımı er vaqıt ömürge keçirilmegen vadelerni degil de, niayet ömürge keçirilecek vadelerni bermek içün merasimimizni ziyaret etmege davet etemiz», – dep yazdı faal.
«Aldatılğan Qırım» mitinginiñ avgust 20-de işğal etilgen Aqmescitte Zenaat birlikleri medeniyet sarayı qarşısındaki meydanda keçirilmesi planlaştırıla. Aynı mitingni Yaltada keçirmege de planlaştıralar, amma Kremlge boysunğan yerli memuriyet merasimniñ keçirilmesini tasdıqlamadı, dep bildire Bolşedvorov.
«Mitingimiz, Rusiyede yaşamaq ümüt etkenler içün, bunı istegen, amma ameldeki boyalanğan ükümetnen bu imkânsız olğanını añlağanlar içündir», – dep añlata teşkilâtçılar merasimniñ maqsadını.
Keçken afta «Aldatılğan Qırım» mitingi teşkilâtçıları İlya Bolşedvorov ve Sergey Akimov Aqmescitte «Nezaketli adamlarğa» bağışlanğan abide yanında ve Lenin meydanında bir kişilik «Qırım-Rusiye» adlı piketler keçirdi, bundan soñ rusiyeli politsiya tarafından tutuldı.
Bundan evel rusiyeli kazak cemiyeti Qırım kazak kadet korpusı şahsiy oquv yurtunıñ qapatılmasına qarşı piketler teşkil etken edi. Bu sene mayıs ayında Aqmescitte mahkeme uyğunlaştırılmağan miting içün memuriy uquq bozuluvı aqqında davanı qanaatlendirdi. İlya Bolşedvorov ve Sergey Akimov 20 biñer ruble para cezası belgilendi.
Avgust 16-da rusiyeli kütleviy haber vastaları Rusiye prezidenti Vladimir Putinniñ bu aftanıñ soñunda işğal etilgen Qırımnı ziyaret etecegi aqqında malümat tarqattı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
