Rusiye prezidenti Vladimir Putin bu aftanıñ soñunda işğal etilgen Qırımnı ziyaret etecek. Şimdilik, ziyaret avgust 19-ğa, cuma kününe planlaştırılğan. Bu aqta RBK, Kremlge yaqın subetdeşlerniñ ve Rusiye Cenübiy federal okrugı vekâletli temsilcilikke yaqın menbanıñ malümatlarına esaslanıp, bildire.
Neşir subetdeşleriniñ sözlerine binaen, Putin yerli memurlarnen körüşecek ola ve işğal etilgen Aqyar yanında yerleşken «Tavrida» gençler lagerini ziyaret etmege niyetlene.
Kremlniñ matbuat hızmeti şimdilik Putinniñ işğal etilgen Qırımğa kelecek ziyareti aqqında malümatnı derc etmey. Bu aqta Cenübiy federal okrugınıñ, bundan da ğayrı, Rusiyege boysunğan Qırım ükümetiniñ saytlarında da malümat yoq.
Keçken sefer Vladimir Putin işğal etilgen Qırımnı mart 18-de ziyaret etti. O vaqıt o, vertolötnen Keriç köprü qurucılıq yerini baqıp çıqtı ve Qırım içtimaiy-iqtisadiy inkşafı boyunca toplaşuv keçirdi.
İyül 25-te Qırımnı Rusiye baş nazir Dmitriy Medvedev ziyaret etti, o vaqıt o, Qırımda yollar qurulması boyunca toplaşuvda iştirak etti. Mayıs 22-de, Qırımğa evelki ziyareti vaqtında, Medvedev Kefede işğal etilgen yarımada müzeyleri müdirlerinen toplaşuv keçirdi.
Soñki vaqıt Moskva ve Kiyev arasındaki munasebetler daa keskin oldı.
Rusiye Federal havfsızlıq hızmeti avgust 10-da bildirdi ki, işğal etilgen Qırımda «Ukraina Mudafaa nazirliginiñ Baş istihbarat idaresi tarafından azırlanılğan» bir sıra terroristik eylemlerniñ yapılmasına yol berilmedi, «onıñ esas obyektleri olaraq yarımadanıñ pek müim infrastruktura ve ayat teminleme elementleri belgilendi». Rusiye prezidenti Vladimir Pütin FSB beyanatını izaatlap, Kiyev muzakereler yolunı degil, terrorğa keçe, dep ayttı.
Ukraina Silâlı quvetleriniñ Baş ştabı Rusiye Federal havfsızlıq hızmetiniñ beyanatlarını red etip, bular provokatsiya olğanını aydınlattı. Ukraina devlet sıñır hızmeti bildirdi ki, Rusiye işğal etken Qırım ve esas Ukraina arasındaki memuriy sıñırğa yañı tehnikanen temin etilgen askerlerni qoydı, ukrainlerge yarımada ziyaretlerinden vazgeçmege tevsiye etile.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
