Ukraina Tışqı işler nazirligi bildire ki, Deutsche Welle almaniyalı halqara cemaat teleradio şirketiniñ mühbiri Yuriy Reşeto Twitter içtimaiy ağında yazğan beyanatlarında #crimeaisrussian («Qırım – bu Rusiye») heştegi (işaret) içün afu soradı.
«Qattı ilân etmege isteyim ki, mühbir işimde Rusiye tarafından Qırım işğalini takbih etken edim, bu, halqara uquqnı boza. Yazıq ki, iyül ayında ziyaretim vaqtında RT-nen (rusiyeli telekanal – QA) yapqanım intervyu bütünley taqdim etilmedi ve bunıñ içün beyanatlarımnıñ manasını başqa köstere», – dep bildire Ukraina Tışqı işler nazirligi Reşetonıñ beyanatını Facebook saifesinde.
«#crimeaisrussian heştegini qullanğanım içün afu sorayım, bu hata oldı. Bu menim hatam, buna pek yazıqsınam», – dep qayd etti mühbir.
«Böyle etip, Deutsche Welle qattı ilân ete ki, Qırım ukrain toprağı ola, qaysı biri qanunsız Rusiye tarafından işğal etildi. Ve bu, şübesiz, Deutsche Welle çoq reportaj ve maqalesinde körüne», – dep ayta ukrain tışqı siyaset müessisesi.
Almaniya, Avropa Birligi azası olaraq, ukrain Qırımı işğali içün Rusiyege qarşı sanktsiyalarğa qol tuta.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
