Qırımdan köçken, rejissör ve teatr ressamı Niko Lapunov Qırım sakinleri ayatı ve yarımada vaziyeti aqqında multfilmler seriyasını azırlay. Birinci seriya endi YouTube ağında taqdim etildi ve 26 biñden ziyade sefer seyir etildi. Yaqın künlerde Lapunov ikâyeniñ tarihını roliklernen taqdim etmege azır.
«Bu, multfilmniñ devamı olacaq, birinci rolikte Qırım tarqatıla, bu aqiqiy vaqıtta olğan şey. Soñra olacağı olacaq, ya da böyle – pek ümüt etkenim olacaq», – dep ayttı rejissör.
Rolik unikal tehnikanen taqdim etile – müellif bütün obrazlarnı ketende nağışlay ve ceryannı videoğa çıqara. Niko Lapunovnıñ Qırım.Aqiqatqa añlatqanına köre, o, nağışlağan kişiler aqqında blog alıp bara, onıñ içün nağış – ayatnıñ ağır vaqialarını başından keçirmege yardım etken hobbidir.
«Nağış – bu qaçuvdır, er şeyni tüşünmemek içün. Ayatıñ qalabalıq olsa, oturıp nağışlaysıñ ve, ğaliba, fikirlerden çetke çekilesiñ. Men yaqında nağışnen oğraşmağa başladım ve mına multfilmni nağışlap baqmağa qarar aldım, süjeti ise, canım ağırğan şey aqqındadır», – dep añlattı fikir müellifi.
Bugün Niko Lapunov Nikolayevde yaşay, o Ukraina qıtaiy qısmına Aqmescitten keldi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
