Link açıqlığı

Rusiyege boysunğan Bağçasaray rayon şurası deputatları nevbetteki sessiyada Bağçasaray rayonı memuriyetiniñ yolbaşçısı vazifesine Viktor Knâzevniñ tayinlenmesi içün rey berdi. Bu aqta rayon memuriyetiniñ matbuat hızmeti bildire.

Bundan evel Viktor Knâzev Bağçasaray rayonı memuriyeti yolbaşçısınıñ birinci muavini vazifesini eda etken edi.

«Konkurs komissiyasınıñ qararına binaen, bu vazifege namzetlernen subetleşme neticelerine köre, Viktor Viktoroviç ihtisas talaplarına uyma boyunca eñ çoq baa aldı», – dep aytıla müessise matbuat hızmetiniñ beyanatında.

Elde etilgen malümatqa binaen, Knâzev 1979 senesi noyabr ayından 2011 senesi avgust ayına qadar KGB ve FSB sıñır ordusında hızmet etti. O, sıñır qaravul gemisiniñ topçu taqımı yolbaşçısı, yalı bazasınıñ mahsulat hızmeti müdiri, arqa boyunca merkezniñ müdir muavini vazifelerini eda etken edi. Arbiy hızmetten 1-ci rang kapitanı unvanında ihtiyatqa çıqarıldı.

2011 senesinden 2012 senesine qadar Yeudiy muhtar vilâyeti ükümeti ve gubernator apparatı yolbaşçısınıñ muavini, bundan soñ, 2015 senesine qadar Yeudi muhtar vilâyeti Leninskoye belediye rayonınıñ memuriyeti yolbaşçısınıñ birinci muavini edi.

2016 senesi iyün 9-da Bağçasaray rayonı memuriyeti yolbaşçısınıñ birinci muavini vazifesine tayinlendi.

Bağçasaray rayonı şurasınıñ ameldeki reisi Refat Derdarov Viktor Knâzevni vazifege buyurğanınen hayırladı ve onıñ «Bağçasaray rayonı memuriyeti yolbaşçısınıñ vazifesini eda etip çalışqan vaqıt devamında köstergen zenaat muvafaqiyetleri ve işke mesüliyetli davranmasını» qayd etti.

2016 senesi fevral ayınıñ ortasında rusiyeli Bağçasaray memuriyeti yolbaşçısı Vladimir Verhovod ve Kremlge boysunğan Bağçasaray şeer şurası reisi Yuriy Gulâyev vazifelerinden boşatıldı.

İyül ayında Bağçasaray memuriyeti yolbaşçısınıñ muavini vazifesine Şevçenko adına Kiyev universitetiniñ mezunı Dana Korotkova tayinlendi.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG