Link açıqlığı

Qırım ile memuriy sıñırda bütün keçirüv noqtaları açıq – Ukraina Devlet sıñır hızmeti


Avgust 15-te işğal etilgen Qırım ile memuriy sıñırda bütün keçirüv noqtaları açıq ve ştat rejiminde çalışa. Bu aqta Qırım.Aqiqatqa Ukraina Devlet sıñır hızmeti spikeri Oleg Slobodân bildirdi.

«Er şey tınçlıq. Er kes ştat rejiminde çalışa. Nevbetler yoq. Yolcu-naqliye aqımınıñ eksilmesini qayd etemiz. İnsanlarnıñ çoqusı işğal etilgen Qırımdan Ukraina qıtaiy qısmına kete», – dep qayd etti o.

Oleg Slobodânnıñ malümatına köre, soñki vaqıt devamında rusiye taraf işni toqtatmağan edi.

Bundan da ğayrı, Ukraina Devlet sıñır hızmeti spikeri qayd etti ki, rusiyeli askerlerniñ faaliyeti memuriy sıñır yanında eksildi.

«Biz tek memuriy sıñırda körgenimizni aytamız. Bu, tünevinki kün devamında aviatsiya qullanılmağanıdır», – dep qayd etti Oleg Slobodân.

2014 senesi Qırım Rusiye tarafından işğal etilgen soñ qıtaiy Ukraina ve yarımada arasında resmiy şekilde – memuriy, amelde ise – aqiqiy bir sınır peyda oldı. Memuriy sıñırda üç kiriş-çıqış noqtası çalışmaqta – «Kalançak», «Çonğar» ve «Çaplınka».

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG