Qırımdaki «diversiyağa» bağışlanğan Rusiye Havfsızlıq şurası toplaşuvında Ukrainağa qarşı konkret cevaplı areketler muzakere etildi, amma olarnı öyle de işlep baqmadılar. Bu aqta «Vedomosti», Rusiye Mudafaa nazirligine yaqın menbağa esaslanıp, bildire.
Bildirilgenine köre, qararnı işlep çıqarması mütenasip müessiselerge avale etildi.
Menbanıñ sözlerine binaen, «Ukrainağa büyük cevaplı arbiy darbe endirmek usulı baqılmay». Amma «DNR» taqımı yolbaşçılarına yaqın olğan subetdeşniñ aytqanına köre, Moskva Ukraina şarqında separatistlerniñ areketlerini tutmaqnı toqtata bile.
Diger menbanıñ malümatına binaen, Rusiye Havfsızlıq şurası şimdilik Vladimir Putin ve rusiyeli Tışqı işler nazirligi Kiyevni qorquzğan konkret «aqibetlerni» daa belgilemedi.
Avgust 10-da Rusiye Federal havfsızlıq hızmeti bildirdi ki, işğal etilgen yarımadada kerçekleştirilecek teraktlarnıñ ögü alındı. Moskva Ukrainanı qabaatlay. Rusiye prezidenti Vladimir Pütin FSB beyanatını izaatlap, Kiyev muzakereler yolunı degil, terrorğa keçe, dep ayttı. O, «norman formatında» sammitni keçirmek «fayda yoq», dep qayd etti.
Ukraina prezidenti Petro Poroşenko Kremlniñ Qırım qabaatları «sebepsiz ve tsinik» olğanını ayttı.
Ukraina Silâlı quvetleriniñ Baş ştabı Rusiye Federal havfsızlıq hızmetiniñ beyanatlarını red etip, bular provokatsiya olğanını aydınlattı. Ukraina devlet sıñır hızmeti bildirdi ki, Rusiye işğal etken Qırım ve esas Ukraina arasındaki memuriy sıñırğa yañı tehnikanen temin etilgen askerlerni qoydı, ukrainlerge yarımada ziyaretlerinden vazgeçmege tevsiye etile.
Ukraina Tışqı işler nazirligi ilân etti ki, Ukrainada Kiyevniñ işğal etilgen Qırımda «terrorizm» ile bağlı olğanı aqqında Rusiyeniñ beyanatlarını takbih eteler, bunıñ Kreml tarafından nevbetteki provokatsiya olğanını aytalar ve bütün bu qabaatlavlarnı delilsiz dep red eteler.
Ukrainada AQŞ elçisi Geoffrey Pyatt bildirdi ki, AQŞ Rusiyeniñ Ukrainağa qarşı «Qırım istilâsı» qabaatlarınıñ delillerini körmedi. Onıñ qayd etkenine köre, «Rusiye Ukrainağa qarşı yalan qabaatlar aytıp, özüniñ yañlış areketlerini gizleycek ola».
Ukraina prezidenti Rusiye tarafından işğal etilgen Qırım ile memuriy sıñırda ve Donbassta bütün sıñır boyunca arbiy azırlıqnı qaviyleştirmege emir etti.
