Qırımda «TSK-Tavriya» futbol klubı Qırım futbol birliginiñ premyer-ligası superkubogınıñ saibi oldı. Avgust 15-te «Krıminform» saytı bildirgen malümatqa köre, Aqmescit futbolcıları matçta «KFU-Bağçasaray» taqımını yeñdi.
Bildirilgenine köre, matç Aqmescit rayonındaki Agrarnoye köyünde keçirildi, oyun 2:0 esabınen yekünlendi.
Qırım futbol birliginiñ premyer-ligası ekinci çempionatı avgust 20-de başlanacaq.
2014 senesiniñ soñunda Avropa futbol assotsiatsiyaları birligi Qırım klublarına Rusiye çempionatında iştirak etmege yasaq etti. UEFA işbirliginen Qırım futbol birligi teşkil etildi. Yazda-küzde birlik Qırımda premyer-liga çempionatınıñ birinci qısmını keçirdi. Qırımnıñ sekiz şeerinden sekiz taqım iştirak etti.
UEFA Qırım boyunca mahsus temsilcisi Avropa futbol assotsiatsiyaları birligi (UEFA) icra komitetiniñ azası Frantişek Laurinets oldı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
