ХIII-ci «Kezlev qapusı» qırımtatar ve türk medeniyeti açıq festivali Kezlevde avgust 17-20 künleri keçirilecek. Bu aqta malümat Rusiyege boysunğan şeer memuriyetiniñ saytında bildirile.
Kremlniñ nezareti astında bulunğan Kezlev memuriyeti yolbaşçısınıñ muavini Elmar Mambetovnıñ aytqanına köre, festivalnıñ esas maqsadı, «Qırım halqlarınıñ milliy medeniyetleri ve adetleriniñ yañıdan tiklenilmesi ve inkişafı, milletlerara munasebetler medeniyeti teşkil etilmesiniñ terenleştirilmesi, umumiy türk halqları medeniy asabalığınıñ populârlaştırılmasıdır».
Festivalnıñ ilk künü Aşıq Umer şeer bağçasında ananeviy aşıq küreşleri keçirilecek. Qırım çalğıcıları şiiriyet ve muzıka sanatında yarışlaşacaq. Bunen beraber, milliy dekorativ-ameliy ve resim sanatı sergi-satuv teşkil etilecek.
Avgust 18-de «Lazurnıy bereg» plâjında qırımtatar küreşi boyunca turnir keçirilecek.
Avgust 19-da festival Karaimskaya soqağına keçecek, o yerde şeer ve Qırım icadiy bala taqımları sanağa çıqacaq, bundan da ğayrı, halq ünerleri mahsulatı sergi-satuvı çalışacaq.
«Kezlev qapusı» avgust 20-de Teatralnaya meydanında yekünlenecek. Festival iştirakçileri şeer soqaqlarında kostümlernen keçecek, saat 20:00-de gala kontsert taqdim etilecek.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
