Link açıqlığı

Qırım kütleviy haber vastaları daa bir «diversantnıñ» yaqalanması aqqında bildire


Kremlge boysunğan Aqmescitteki Kiyev rayon mahkemesi Andrey Zahteyni apiste qapattı, onı rusiyeli mahsus hızmetler Qırımda terakt teşkil etilmesinde şeklenip yaqaladı. Toplaşuv qapalı şekilde keçirildi, dep bildire «RİA Krım» agentligi.

Agentlik, şahsiy menbanıñ malümatına esaslanıp, bildire ki, Zahtey 1 ay ve 26 künge apiske qapatıldı.

Mahkeme saytında toplaşuv aqqında malümat yoq.

Avgust 11-de Rusiyege boysunğan Kiyev rayon mahkemesi Zaporojye vilâyeti sakini Yevgeniy Panovnı 2 ayğa apiske qapattı, o da Qırım territoriyasında «diversiya» yapqanında şeklenile.

Tünevin rusiyeli Tışqı işler nazirligi işğal etilgen Qırımda «terakt azırlaması» boyunca şeklenilgen ekinci yaqalanğan kişiniñ soyadını ayttı. Tışqı siyaset müessisesinde beyanatında qayd etilgenine köre, ekinci yaqalanğan kişi Zahtey Andrey Romanoviç ola.

Avgust 10-da, çarşenbe künü FSB Qırımda sanki bir sıra terakt azırlağan diversant taqımını yarımadada tutqanı aqqında ilân etti. Federal havfsızlıq hızmetiniñ malümatına binaen, mahsus ameliyat neticesinde eki rusiyeli uquq qoruyıcı elâk oldı. Zaporojye vilâyeti Energodar sakini Yevgeniy Panov terakt teşkilâtçısı olaraq ilân etildi, onı ukrain istihbaratına çalışqanında qabaatladılar.

Avgust 10-da, çarşenbe künü Rusiye prezidenti Vladimir Putin, Ukraina «Qırımda terakt» azırlağanı aqqında rusiyeli FSB-nıñ beyanatına izaat berip, ilân etti ki, Kiyev muzakereler yollarını qıdırmay, amma terrorğa keçe. O, «norman formatında» sammitni keçirmek «fayda yoq», dep qayd etti.

Ukraina prezidenti Petro Poroşenko Kremlniñ Qırım boyunca qabaatlavlarını «mantıqsız ve tsinik» dep adlandırdı.

Ukraina Silâlı quvetler Baş ştabında Rusiye Federal havfsızlıq hızmetiniñ beyanatını red ete.

Ukraina Tışqı işler nazirligi ilân etti ki, Ukrainada Kiyevniñ işğal etilgen Qırımda «terrorizm» ile bağlı olğanı aqqında Rusiyeniñ beyanatlarını takbih eteler, bunıñ Kreml tarafından nevbetteki provokatsiya olğanını aytalar ve bütün bu qabaatlavlarnı delilsiz dep red eteler.

Avgust 11-de ukrain prezidenti Ukraina Silâlı quvetler, Milliy Gvardiya, Ukraina Havfsızlıq hızmeti bölüklerini Rusiye tarafından işğal etilgen Qırım ile memuriy sıñırda ve Donbassta bütün sıñır boyunca qaviyleştirilgen arbiy azırlıq alına ketirmege emir etti.

XS
SM
MD
LG