Link açıqlığı

Saatnıñ esas haberi

Çubarov: Qırımda FSB tarafından yaqalanğan Suleymanov büyük belâğa oğradı


Refat Çubarov
Refat Çubarov

Qırımtatar Milliy Meclisi reisi Refat Çubarov Facebook saifesinde bildirdi ki, oña endi «Ridvan Suleymanov aqqında ilk malümatlar kele».

«Tahmin etkenimizge köre, adam aqiqiydir ve büyük belâğa oğradı: tahminlerge köre, FSB tarafından üç afta evel yaqalandı. Aqmescit rayonındaki bir köyde yaşay edi. Belki, Zaporojyede qayd etilip yazılğan edi, amma er vaqıt Qırımda yaşay edi. Onıñ bütün yaqınları ve soy-sopları Qırımda yaşay, amma onıñ yaqalanmasını saqlay. Qırım sakinleriniñ bir qısmı içün böyle areketler tabiiy olayata, olarnı qorquzalar ki, eger olar qomşularğa öz problemaları aqqında aytsa, yaqalanğan yaqınlarını iç bir vaqıt sağ körmezler», – dep bildirdi Çubarov.

Avgust 12-de rusiyeli kütleviy haber vastaları rusiyeli FSB çıqarğan videonı paylaştı, videoda insan sorğuğa çekile, onı işğal etilgen Qırımda «terakt» azırlağan ukrain kişi olaraq taqdim eteler. Aqay kişi özüni Zaporojye sakini Suleymanov olaraq tanıta. FSB onıñ «Ukraina Mudafaa nazirligi Baş istihbarat idaresiniñ agenti» olğanını ayta.

Videodaki aqay kişi qayd ete ki, oktâbr ayında celp etildi ve Qırım territoriyasında «arbiy malümatnı» ayda 4 biñ grivna aylığınen toplamaq kerek edi. Avgust 11-de Rusiyede Zaporojye sakini Yevgeniy Panovnıñ sorğuğa çekilgen videosı paylaşıldı, FSB onı Qırımda teraktlar azırlağanında qabaatlay. Videoda Yevgeniy Panov yaralanğan yüznen añlata ki, o, «ATO zonasında 2014 senesi avgust ayından 2015 senesi avgust ayına qadar hızmet etken edi», bundan soñ Kiyevge davet etildi, o yerde oña «Qırım toprağında diversiya aktsiyaları keçirilmesi içün gruppa teşkil etilgeni añlatıldı».

Rusiyege boysunğan Aqmescitteki Kiyev rayon mahkemesi avgust 11-de Yevgeniy Panovnı eki ayğa apiske qapattı.

Avgust 10-da Rusiye Federal havfsızlıq hızmeti ilân etti ki, işğal etilgen Qırımda «yarımada infrastrukturası ve ayat teminlemesi pek müim obyektlerinde» teraktlarnıñ ögüni kördi, Ukraina Mudafaa nazirligi Baş istihbarat idaresini bunı azırlağanında qabaatladı, «diversiya» teşkilâtçılarından biri yaqalanğanı aqqında bildirdi.

Ukrain polkovnigi, Ukraina prezidenti memuriyetiniñ ATO meseleleri boyunca mesleatçısı Aleksandr Motuzânik avgust 11-de bildirdi ki, Ukraina Qırım ile memuriy sıñırda silâlı provokatsiyalarnı yapmadı, yarımadada iç bir istihbarat hadimi yaqalanmağan edi.

Ukraina politsiyası Yevgeniy Panovnıñ qaçırılması boyunca, onıñ soylarınıñ muracaatınen, cinaiy iş açtı. Ukraina Milliy politsiyası matbuat hızmetiniñ bildirgenine köre, taqiqatçılar bunı Ukraina Cinaiy kodeksiniñ 146 maddesi (qanunsız azatlıqtan marum etme ya da insannı qaçırma) boyunca qayd etti.

XS
SM
MD
LG