Link açıqlığı

Qırımtatar Milliy Meclisi reisiniñ birinci muavini Nariman Celâl bildire ki, avgust 12-de saba Rusiye arbiyleri İçki rayonınıñ Ferngeym (Urojaynoye) köyünden Aqmescitke Ahtem Çiygoznıñ mahkemesine yol alğan qırımtatar faalleriniñ maşinasını toqtattı.

«Maşina Aqmescit yolunda üç kere baqıldı. Soñki kere yolnı KamAZ qapattı ve uquq qoruyıcılar maşina ve vesiqalarnı teşkerdiler», – dep añlattı Qırım.Aqiqatqa Celâl.

Onıñ aytqanına köre, Rusiye silâlı arbiyleri ile blokpostlar yarımada yollarında tura. Celâl qayd etti ki, erkeklerni teşkereler.

Cuma künü, avgust 12-de, Rusiye kontrol etken Qırım Yuqarı mahkemesinde Meclis reisiniñ muavini Ahtem Çiygoznıñ «fevral 26 işi» baqılmaqta. Adliyecisi Nikolay Polozovnıñ malümatına köre, saat 10:00 başlanacaq mahkeme yarım saat keç qaldı.

Avgust 9-da mahkeme esnasta Emil Kürbedinovnıñ iştirak etmesini red etti. Keçken toplaşuvda mahkemeciler prokuror Dombrovskiyniñ çekilmesine razı olmayıp, «halq haciziniñ inspektorı» olaraq tanıtılğan zarar körgenlerden birini sorğuğa çekti.

Avgust 2-de Aqmescitte Rusiyege boysunğan Qırım Yuqarı mahkemesi Ahtem Çiygozğa qarşı «fevral 26 işini» baqmağa başladı. Mahkeme qararına binaen, toplaşuv video konferentsiyası rejiminde keçirildi. Mahkeme Çiygoznıñ adliyecisiniñ video bağ rejimi boyunca şikâyet arizasını qabul etmege red etti, endi imayeciler kassatsiyanı azırlay.

Ahtem Çiygoz mahkemede özüni qabaatlı tanımadı, dep bildirdi adliyecisi Nikolay Polozov.

İyül 20-de mahkeme qapalı toplaşuvda «fevral 26 işini» ekige böldi: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.

Qırım Rusiye tarafından işğal etilgen soñ yarımadada Rusiye uquq qoruyıcıları Ukraina topraq bütünligine qoltutqan ve Qırımnıñ şimdiki yolbaşçısı Sergey Aksönov yolbaşçılığında «Rus birligi» firqasınıñ faallerine qarşı çıqqan qırımtatar faallerini mahküm etmege başladılar.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG