Qırımda Rusiye kontrol etken prokuratura «internette ruslarğa qarşı ğayelerni paylaşqan» Yalta sakinine qarşı cinaiy işniñ açılması qanunğa uyğanını tasdıqladı.
Bunı işğal etilgen Qırım prokuraturasınıñ matbuat hızmeti bildire.
«Yalta sakini Facebook içtimaiy ağındaki saifesinde milliy çizgilerge köre bir gruppanı teşkil etken insanlarğa qarşı nefret doğuracaq malümatnı yerleştirdi», – dep aytıla prokuraturanıñ beyanatında.
Bu areketler Rusiye Ceza kodeksiniñ 282-nci maddesiniñ 1-inci qısmında qayd etilgen cinayet (açıq sürette milliy çizgilerge köre nefret ya da qavğa çıqarılması) olaraq tanıldı.
Qırımnıñ Rusiye prokuraturası içtimaiy ağlarda malümat paylaşqan internet qullanıcılarınıñ cinaiy mesülyietke çekilmesini muntazam sürette bildire.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
