Qırımtatar Milliy Meclisi reis muavini İlmi Umerovnıñ qızı Ayşe bildire ki, avgust 11-de mahkeme zalından hastahanege alıp ketirilgen onıñ babası bu yerde bazarertesi kününe qadar qalacaq.
Umerov, Aqmescit 7-ci şeer hastahanesiniñ kardiologiya bölügine infarkt telükesinen yatqızıldı. Onıñ qızı bildirgen malümatqa köre, şimdiki vaqıtta o kapelnitsanen yata.
«Babamnıñ qan basımı tüzetleştirildi, özüne kele. Bazarertesi kününe qadar 7-ci şeer hastahanesi kardiologiya bölüginde bulunacaq», – dep bildirdi Ayşe Umerova Facebook saifesinde.
İlmi Umerovnıñ alı avgust 11-de Qırımda oña qarşı psihiatrik ekspertizanıñ belgilenmesi boyunca mahkemede yaramay oldı. Acele yardım kelip, kardiografik tedqiq yapqan soñ, Umerovnı Aqmescit şeer 7-ci hastahanesine alıp kettiler. Bundan soñ Rusiyege boysunğan Aqmescitteki Kiyev rayon mahkemesi Umerovnıñ statsionar mahkeme-psihiatrik ekspertizadan keçmesi kerek olğanı aqqında qarar aldı.
Bundan evel Umerov, Kremlge boysunğan Aqmescitteki Kiyev rayon mahkemesine oña qarşı cinaiy iş açılması aqqında qararğa qarşı şikâyet arizasını berdi. Bunen beraber, o, FSB taqiqatçısı adına ambulatoriyada mahkeme-psihiatrik ekspertizadan öz isteginen keçmege red etkeni aqqında arizanı berdi, bunı şahısnı itibardan tüşürme ve iş adı-sanını aşalama ıntıluvı olaraq körgenini bildirdi.
Qırımda uquq qoruyıcılar İlmi Umerovğa qarşı Rusiye Cinaiy kodeksiniñ 280.1 maddesi (separatizm) boyunca cinaiy iş açtı.
«Memorial» rusiyeli uquq qoruyıcı merkezinde Qırımtatar Milliy Meclisi reisiniñ muavini İlmi Umerovğa qarşı işğal etilgen Qırımda cinaiy taqipni qanunsız ve siyasiy sebeplerden olğanını ayttılar, çünki o, zorbalıq areketlerine çağırmay edi.
