Link açıqlığı

Rusiye Federatsiyası Silâlı quvetlerinde bütün taraflı teminleme çeşitleri boyunca mahsus ögrenüvler başlandı. Rusiye Mudafaa nazirligi matbuat hızmetiniñ malümatına binaen, ögrenüvler Cenübiy arbiy okrugınıñ poligonları, uçaq alanları ve ögrenüv-idman komplekslerinde ve Qara deñiz suv alanında keçirilecek.

«Maddiy-tehnikiy, müendislik, maneviy-ruhiy teminleme, bağ tiklemesi, radioelektron küreş, radiatsion, himik ve biologik saqlavnıñ teşkil etilmesi meselesi ögrenilip amelde işlenecek», – dep aytıla müessise beyanatında.

Ögrenüvler bir qaç basamaqtan ibaret olacaq, olarnıñ neticelerine köre, arbiy idare, birleşüv ve arbiy bölükler organları «Qavqaz-2016» strategik taqım-ştab ögrenüvinde iştirak etmek içün azır olğanlarınıñ seviyesine qıymet kesilecek.

Mahsus ögrenüvlerge 2,5 biñ asker celp etildi, tahminen 350 arbiy ve mahsus tehnika aleti qullanılacaq.

Ögrenüvler avgust 20-ge qadar devam etecek. Bu, işğal etilgen Qırımdaki vaziyeti kerginleşken vaqıtta keçirile.

Ukraina Arbiy deñiz quvetleri cumaaqşamı bildirdi ki, devletniñ cenübindeki Zaporojye ve Herson vilâyetlerinde arbiy ögrenüvler keçirile.

Avgust 10-da, çarşenbe künü Rusiye prezidenti Vladimir Putin, Ukraina «Qırımda terakt» azırlağanı aqqında rusiyeli FSB-nıñ beyanatına izaat berip, ilân etti ki, Kiyev muzakereler yollarını qıdırmay, amma terrorğa keçe.

Ukraina prezidenti Petro Poroşenko Kremlniñ Qırım boyunca qabaatlavlarını «mantıqsız ve utanmazca» dep adlandırdı.

Ukraina Silâlı quvetler Baş ştabında Rusiye Federal havfsızlıq hızmetiniñ beyanatını red ete.

Ukraina Tışqı işler nazirligi ilân etti ki, Ukrainada Kiyevniñ işğal etilgen Qırımda «terrorizm» ile bağlı olğanı aqqında Rusiyeniñ beyanatlarını takbih eteler, bunıñ Kreml tarafından nevbetteki provokatsiya olğanını aytalar ve bütün bu qabaatlavlarnı delilsiz dep red eteler.

XS
SM
MD
LG