Qırımtatar Milliy Meclisi reisiniñ muavini İlmi Umerovnıñ alı avgust 11-de Qırımda oña qarşı psihiatrik ekspertizanıñ belgilenmesi boyunca mahkemede yaramay oldı. Acele yardım kelip, kardiografik tedqiq yapqan soñ, Umerovnı Aqmescit şeer 7-ci hastahanesine alıp kettiler. Bu aqta Meclis reisiniñ birinci muavini Nariman Celâl Facebook saifesinde bildirdi.
«Basım 220/100, infarkt telükesi», – dep qayd etti Twitterde adliyeci Nikolay Polozov.
Saat 11:00-ge belgilengen bu iş boyunca toplaşuv bir saat keççe başlandı. Zalda çoq adam toplaştı, olar İlmi Umerovğa qol tutmaq içün keldi.
Umerovnıñ sağlığı yaramay olğanı aqqında beyanatlarından soñ mahkemeci er keske zaldan çıqmağa avale etti.
«Acele yardımnı beklemeyip, adamlarğa zalğa kirmege yasaq etip, de-fakto qapalı şekilde, mahkemeci Rube qarar alınmasına ketti», – dep yazdı adliyeci.
Umerov, Kremlge boysunğan Aqmescitteki Kiyev rayon mahkemesine oña qarşı cinaiy iş açılması aqqında qararğa qarşı şikâyet arizasını berdi. Bunen beraber, o, FSB taqiqatçısı adına ambulatoriyada mahkeme-psihiatrik ekspertizadan öz isteginen keçmege red etkeni aqqında arizanı berdi, bunı şahısnı itibardan tüşürme ve iş adı-sanını aşalama ıntıluvı olaraq körgenini bildirdi.
Qırımda uquq qoruyıcılar İlmi Umerovğa qarşı Rusiye Cinaiy kodeksiniñ 280.1 maddesi (separatizm) boyunca cinaiy iş açtı.
«Memorial» rusiyeli uquq qoruyıcı merkezinde Qırımtatar Milliy Meclisi reisiniñ muavini İlmi Umerovğa qarşı işğal etilgen Qırımda cinaiy taqipni qanunsız ve siyasiy sebeplerden olğanını ayttılar, çünki o, zorbalıq areketlerine çağırmay edi.
